Euroviisuh-lávlumkišto 2013

Euroviisuh-lávlumkišto 2013 lâi 58. kerdi, ko lávlumkišto uárnejui. Kišto uárnejui Malmöst, Ruotâst, tondiet ko Ruotâ ovdâsteijee Loreen vuoitij ive 2012 kišto, ko sun finnij finalist 372 čyegisid pitástis Euphoria.

Semifinaleh uárnejuvvojii vyesimáánu 14. peeivi já 16. peeivi. Fiinaal uárnejui vyesimáánu 18. peeivi 2013. Taat lâi viiđâd kerdi, ko Euroviisuh uárnejuvvojii Ruotâst já nubbe kerdi, ko toh uárnejuvvojii Malmöst. Ovdil 2013 Euroviisuh lijjii uárnejum Ruotâst čuávuvávt: Malmöst iivij 1992, Tukholmast iivij 1975 já 2000 já Göteborgist ive 1985.

Kiišton uásálistii ohtsis 39 staattâd. Armenia lâi kiäsádâttâm ive 2012 kištoost torvolâšvuotâsuujâin Várádâh-Karabah konflikt keežild, mut maacâi ive 2013. Bosnia-Hercegovina, Portugal, Slovakia já Turkki iä uásálistám ive 2013 kiišton.

Tanska ovdâsteijee Emmelie de Forest finnij finalist 281 čyegisid pitástis Only Teardrops já vuoitij kišto.

Tábáhtussaje

Kišto semifinalij já fiinaal saje (ruopsis riävnu)

Malmö Arena, kost uárnejuvvojii sehe ive 2013 já ive 2024 Euroviisuh-lávlumkištoh

Ive 2013 Euroviisui lyevi Malmö Arenast

Ive 2013 Euroviisui tábáhtussaijeen lâi maaŋgâtooimâareena Malmö Arena Malmöst, Ruotâst. Malmö Arena lii Ruotâ nubben stuárráámus maaŋgâtooimâareena. Toos čäähih 15 500 olmožid keččâđ Ruotâ jieŋâskiärruliiga juávhu Malmö Redhawks. Siämmáá saajeest uárnejuvvojii meiddei ive 2024 Euroviisuh.

Formaat

Vuolgâttâsâin västideijee Sveriges Television (SVT) meridij ovdil kišto toohâđ maaŋgâid stuorrâ nubástusâid tegu koloi merhâšittee kepidem já jođetteijei mere čuoppâm, nuuvt ete ive 2013 lâi tuše ohtâ jođetteijee.

Juávhoid jyehim semifinalij várás

Uásálisteeh juáhhojii viiđâ juávkun uđđâivemáánu 17. peeivi 2013 Malmö kaavpugtáálust. Tanska já Taažâ meddâlistojii jyehimist, tastko kuohtuuh láá Malmö aldasijn já vuordui, ete tanskaliih já taažah šamâččii Malmön, mondiet EBU meridij, ete Tanska uásálistáččij vuossâmuu semifinalân já Taažâ nube semifinalân. Maŋeláá Israel ánuttij uásálistiđ nube semifinalân, tastko vuossâmuš semifiinaal lâi vyesimáánu 14. peeivi, mii lâi talle almolâš juhlepeivi Israelist.^[1]

Jyehim vuáđudui ovdebij oovce ive jienâstmáid.^[1] Espanja, Italia, Ranska, Saksa Ovtâstum kunâgâskodde já oovdeb ive vyeittee Ruotâ pessii njuolgist finalân.^[1]

Juávkku 1	Juávkku 2	Juávkku 3	Juávkku 4	Juávkku 5
Albania Kroatia Makedonia Montenegro Serbia Sveicci	Eestieennâm Irland Island Latvia Liettua Suomâ	Armenia Azerbaidžan Georgia Ruoššâ Ukraina Vielgis-Ruoššâ	Belgia Bulgaria Kreikka Kypros Malta Vuáládâhenâmeh	Moldova Nuorttâriijkâ Romania San Marino Slovenia Uŋgar