Anarâš-lostâ
Anarâš-lostâ lii Anarâškielâ servi ry jeessânlostâ, mast táválávt almostuvá 2–4 nummeer ivveest. Numerij lasseen Anarâškielâ servi lii meid almostittám jyehi ive Anarâš-kalender, mast lii jyehi ive lamaš sierâ fáddá. Anarâš-loostâ toimâttem algâttui ive 1988, já ton vuosmuš toimâtteijee Uccpárnáá Vuoli Ilmar västidij loostâ tooimâtmist kulmâlov ihheed. Tääl loostâ tooimâtmist västid Fabrizio Brecciaroli.
Lostâ vuolgâttuvvoo Suomâ lasseen Japanân, Ovtâstum staatáid, Kanadan, Saaksan, Hollandân, Sveeicin, Ruotân já Taažân.
Historjá
muteAnarâškielâ seervi toimâttem Anarâš-lostâ almostuuškuođij ive 1988, já ton vuosmuš nummeer lâi A5-stuárusâš mááŋgus. Numerist lijjii seervi pevdikirjeh, muáddi säniruossâháá, muáddi sargum kove, saavâjođetteijee sänivuáru já toimâttâs postâpalsta, mast pieijui joton loostâ nommâkišto. Numerist lâi meiddei siemin uđđâsâš esken toollum vuosmuu anarâškielâ kuursâst, mii uárnejui Avelist kesimáánust 1988. Kuursâ ornij Laapi ollâopâttâh, já máttáátteijen láin Kuobžâ-Saammâl Matti (Matti Morottaja) já Sevtil-Piäkká (Pekka Sammallahti). Kurssâliih lijjii neljinubáloh, já maaŋgâs tááláin čällein čallii talle vuosmuu keerdi jieijâs eenikielân.
Anarâš almostui nube keerdi Sápmelaš-loostâ lahtosin ive maŋeláá. Taat lâi juo kirjeteddilemlájádâsâst teddilum lostâ mut vala čapisvielgâd. Ihepele maŋeláá, kesimáánust 1990, almostui vuosmuu keerdi olmâ Anarâš-lostâ, mon olgosaddelmân servi lâi finnim ruuđâ Máttááttâsministeriöst kyevti nummeer várás. Tot-uv lâi vala čapisvielgâd, mut juovláid 1990 almostui jo ivnekuvijgijn hervejum nummeer.
Kalender almostui vuosmuu kerd ive 1996, já tast lijjii fáárust Suomâst kevttum ulmuunoomah anarâškielân.