Low
| Low David Bowie | ||
|---|---|---|
| Studioalbum tiäđuh | ||
| Päddejum | čohčâmáánu – roovvâdmáánu 1976 | |
| Studio | Château d’Hérouville, Ranska já Hansa by the Wall, Viestâr-Berlin, Saksa | |
| Almostittum | uđđâivemáánu 14. peeivi 1977 | |
| Pyevtitteijee(h) | David Bowie, Tony Visconti | |
| Šlajâtijppâ | taaiđârock, ambient, krautrock, keččâlâddâmvuálásâš rock | |
| Pištem | 38.48 | |
| Skiärrufinnodâh | RCA Records | |
| Listosajaduvah | ||
| ||
| David Bowie eres almostitmeh | ||
| Station to Station 1976 |
Low 1977 |
"Heroes" 1977 |
Low lii eŋlandlâš musikkár David Bowie 11. studioalbum. Viestâr-Berlinân varrim Bowie raahtij album oovtâstpargoost Roxy Music -juávhust kulostum Brian Enoin. Puáđusin lâi keččâlâddâmvuálásâš ambient- já krautrock-vaikuttâsâš album, mast syntetisaattor lâi tergâdis uási. Low algâttij Bowie nuuvt kočodum Berlin-trilogia, moos kuleh meid suu kyehti čuávuváá album "Heroes" (1977) já Lodger. Low lokkekove já nommâ čujotteh toos, ete Bowie irâttij toollâđ "vyeligis proofiil".
Veik kritikkáreh valdii album vuástá ruossâlávt, tom aneh tááláá ääigi áárvust uáli ennuv. Ive 2003 Rolling Stone -lostâ valjij tom 500 Greatest Albums of All Time -listoos sajan 249. Pitchfork-lostâ vuod valjij tom 1970-lovo pyeremus albumin. Album lii oonnum almolávt ohtân Bowie pyeremuin albumijn, já meid Bowie jieš oonij tom ohtân karrieeris pyeremuin albumijn. Low ij kuittâggin miänástum kávpálávt nuuvt pyereest ko ovdebeh albumeh.
Album tobdosumos pittá lii "Sound and Vision", mii pajanij Britannia singlelisto kuálmádân. Nubbe single "Be My Wife" ij miänástum kávpálávt ijge tot pajanâm ollágin Britannia singleliiston.
Jienâttem mute
Album vuolgâsaijeen lijjii nuotâstâsah, moh lijjii tárguttâssân leđe The Man Who Fell to Earth -elleekove soundtrackist. Äigiraajij tiet elleekove pyevtitteijeeh kuittâg-uv pálkkááttii musikkár John Phillips muusik nuotâsteijen. Maŋeláá elleekove stivrejeijee Nicolas Roeg pahudij, ete Low muusik ličij sooppâm tievâslávt toos.
Bowie lâi kiddiistum uđđâ elektronisâš muusikist, já Low stiijlâst láá ennuv saksalâš krautrock jiešvuođah.
Jienâttem aalgâst ij lamaš vala visesvuotâ pitái almostitmist, mut Bowie halijdij algâalgâlávt tuše keččâliđ uđđâ aašijd ovdil čuávuváá "virgálâš" album. Ko jienâtmeh lijjii masa valmâšeh, te pyevtitteijee Tony Visconti adelij materiaal vuossâmuu versio Bowien, kii hiäiluttij kasseet moovtâ já eeđâi "Mist lii album!".
Bowie já Eno keččâláin viehâ omâs muusikrähtimvuovijd jienâttem ääigi. Bowie mainâstij ive 1993:
"Muoi vuáváim systeemijd, moiguin mun ovdâmerkkân čuojâttim pianouási já luoštim talle regulaattorijd vuálus, kuás kullojii tuše ruumbuh, já Eno tieđij tuše nuottâšlaajâ. Talle sun čuojâttij mottoom eres čuojânâs nuuvt, ete sun ij kuullâm maid mun čuojâttim, mut sun kuittâg tieđij nuottâšlaajâ. Tast maŋa muoi čuojâttáim vuáruluvâi nuuvt, ete kuábáškin ij tiättám maid nubbe čuojâttij, já peeivi loopâst muoi luptijm puoh já kuldâláim maid muoi láim finnim ááigán."
Bowie já Eno oovtâstpargo tiet ritmâkitarist Carlos Alomar roolâ ij lamaš innig nuuvt tehálâš ko kyevti oovdeb album rähtimist. Alomar lâi áámmátmusikkárin luuhâm muusik teoria, já sust lijjii vädisvuođah tuhhiittiđ Eno epitáválijd vuovijd. Jienâlávt albumân enâmustáá vaikuttij kuittâg-uv pyevtitteijee Tony Visconti. Sun lâi ovdâsvástádâsâst ovdâmerkkân album rumbujienâin, moh láá kočodum spiekâstâhlâžžân, brutaalin já meekaanlâžžân. Visconti raahtij efekt Harmonizer-mašináin, mon vievâst puovtij stelliđ nuottâaloduv, veik ij muttám liävtu. Puáđus lii oonnum joba vääldikomettemlâžžân. Tom puáhtá kuullâđ pittáin "Speed of Life", "Breaking Glass" já "Sound and Vision". Eno vuod puovtij studion EMS-syntetisaattoris, mast iä lamaš ollágin kuoskâttuvah, mut tuše suábbi, moin puovtij rähtiđ jienâefektijd. Studiost kiävttojii meid eres kuoskâttâsčuojânâsah, tego Bowie Chamberlin.
Pitáh mute
| Num. | Nommâ | Kukkodâh |
|---|---|---|
| 1. | "Speed of Life" | 2.47 |
| 2. | "Breaking Glass" | 1.52 |
| 3. | "What in the World" | 2.23 |
| 4. | "Sound and Vision" | 3.03 |
| 5. | "Always Crashing in the Same Car" | 3.29 |
| 6. | "Be My Wife" | 2.56 |
| 7. | "A New Career in a New Town" | 2.51 |
| Num. | Nommâ | Kukkodâh |
|---|---|---|
| 8. | "Warszawa" | 6.20 |
| 9. | "Art Decade" | 3.44 |
| 10. | "Weeping Wall" | 3.26 |
| 11. | "Subterraneans" | 5.39 |
| Ohtsis: | 38.48 | |
Čuojâtteijeeh mute
- David Bowie – laavlâ, kiitaar, ARP-syntetisaattor, saksofon, njälmiharppâ, piano, vibrafon, ksylofon, Chamberlin
- Brian Eno – laavlâ, minimoog, ARP-syntetisaattor, Chamberlin, piano
- Carlos Alomar – ritmâkiitaar
- Ricky Gardiner – kiitaar
- George Murray – basso
- Roy Young – piano, farfisa-uurguh
- Dennis David – časkemčuojânâsah
- Mary Visconti, Iggy Pop – tuáváášlaavlâ
- Eduard Meyer – sello
