Roxy Music

Roxy Music lâi ive 1970 vuáđudum eŋlandlâš rock-juávkku. Juávhu tobdosumos häämi lâi Bryan Ferry (laavlâ, kuoskâttâsčuojânâsah), Phil Manzanera (kiitaar), Andy Mackay (saksofon, oboe), Paul Thompson (ruumbuh) já Brian Eno (syntetisaattor). Eno vuolgij juávhust ive 1973 já suu sajan poođij Eddie Jobson.

Roxy Music
Roxy Music ive 1973
Tiäđuh
Aktiivlâžžân	1970–1976, 1978–1983, 2001–2011, 2019
Stijlâšlaajâ	taaiđârock, glam rock, poprock, sophisti-pop, synthpop
Päikkisaje	Lontoo, Ovtâstum kunâgâskodde
Lávlumkielâ	eŋgâlâskielâ
Jesâneh	Bryan Ferry, laavlâ, kuoskâttâsčuojânâsah Andy Mackay, saksofon, oboe Paul Thompson, ruumbuh Phil Manzanera, kiitaar
Ovdiih jesâneh	Brian Eno, syntetisaattor (1970–1973) Graham Simpson, basso (1970–1972) David O'List, kiitaar (1970–1972) Roger Bunn, kiitaar (1971) Dexter Lloyd, ruumbuh (1971) Rik Kenton, basso (1972) John Porter, basso (1972–1973) John Gustafson, basso (1973–1975) Eddie Jobson, syntetisaattor, kuoskâttâsčuojânâsah, šleđgâvivlu (1973–1976)
Skiärrufinnodâh	Island, E.G., Virgin, Alco, Warner bros.

Roxy Music kiddij ennuv huámmášume muotin, glamourân, elleekuuvijd, pop-taiđui sehe avantgarden, já ton jiešvuottân lâi stijlâtiäđulâš, mut kuásnii meid omâs kárvudâttâm.

Bryan Ferry haijij juávhu 1980-lovo aalgâst já algâttij soolokarrieer.

Historjá

Roxy Music vuáđudáin ive 1970 lávloo já kuoskâttâsčuojâtteijee Bryan Ferry sehe basist Graham Simpson. Fáárun váldojii meid saksofonist Andy Mackay, kuoskâttâsčuojâtteijee Brian Eno, rumbal Dexter Lloyd já kitarist Roger Bunn. Kyehti majemuu vuolgijn jo viehâ forgâ juávhust, já sunnuu sajan finnejii lostâ-almottâs vievâst Paul Thompson já David O'List, kiän sajan vuod ive 1972 aalgâst poođij Phil Manzanera. Juávhu nommâ lâi aalgâst tuše "Roxy", mut tot lâi jo nube juáhu nommân, te juávkku meridij molsođ tom. Simpson vuolgij juávhust ovdil vuosmuu album almostittem, já suu saajest kiävttojii tast maŋa jieškote-uvlágáneh basisteh.

Juávhu vuosmuš album Roxy Music (1972) pajanij Britannia top-10 -albumliiston, já single "Virginia Pain" singleliiston. Meid nubbe album, For Your Pleasure (1973) miänástui Britanniast pyereest. Juávhu haldâšijjee jesâneh Bryan Ferry já Brian Eno stivrijn kyevti vuosmuu album ääigi juávhu muusik eres sundijd. Ferry lijkkui ameriklâš soulân já beatleslágán popân, ko vuod Eno lijkkui The Velvet Underground stijlâsâš keččâlâddâmvuálásâš muusikân. Eno vuolgij juávhust ive 1973, tastko Ferry ij tuhhiittâm suu pittáid juávhu albumáid. Eno vyelgim maŋa juávkku joođhij vala muáddi ive taaiđârock-stiijlâ. Eno sajan poođij Eddie Jobson.

Kuálmád album Stranded (1973) lâi juávhu vuosmuš listokeeči Britanniast. Čuávuvâš album Country Life (1974) pajanij meid Ovtâstum staatâi liiston.

Nuuvt ko Bryan Ferry, meid eres juávhu jesâneh almostittii meid sooloalbumijd 1970-lovvoost. Juávkku toolâi puudâ iivijn 1976–1978. Ive 1978 juávkun pottii kuoskâttâsčuojâtteijee Paul Carrack sehe basisteh Gary Tibbs já Alan Spenner. Uđđâ album Manifesto (1979) lâi tonáigásâš diskovaikuttâsâš soul-pop, mut sii mielâstumvuotâ siälui nuuvt Britanniast ko Amerikist-uv. Juávhu peeggâlmumos album lii Avalon (1982), mii lâi kulmâ oho Britannia albumlisto keejist já lâi juávhu áinoo kolleskiärru Ovtâstum staatâin.

Roxy Music pieđgânij ive 1983, ko Bryan Ferry algâttij soolokarrieeris. Juávkku maacâi ive 2001 já lávdástij ive 2011 räi.

Roxy Music peesâi ive 2019 Rock and Roll Hall of Famen, já Ferry, Manzanera sehe Mackay čuojâttii seremoniast kuttâ pitá.

Diskografia

Studioalbumeh

• Roxy Music (1972)
• For Your Pleasure (1973)
• Stranded (1973)
• Country Life (1974)
• Siren (1975)
• Manifesto (1979)
• Flesh + Blood (1980)
• Avalon (1982)

Livealbumeh

• Viva! (1976)
• Heart Still Beating (1990, jienâttum 1982)

Jesâneh

Fastâ jesâneh

• Bryan Ferry – laavlâ, piano, kuoskâttâsčuojânâsah, ritmâkiitaar
• Phil Manzanera – kiitaar
• Andy Mackay – saksofon, oboe, kuoskâttâsčuojânâsah, tuáváášlaavlâ
• Paul Thompson – ruumbuh

Ovdiih jesâneh

• Brian Eno – syntetisaattor, tuáváášlaavlâ (1970–1973)
• Eddie Jobson – syntetisaattor, kuoskâttâsčuojânâsah, šleđgâvivlu (1973–1976)
• Graham Simpson – basso (1970–1972)
• Rik Kenton – basso (1972)
• John Porter – basso (1972–1973)
• John Gustafson – basso (1973–1975)
• Sal Maida – basso (1973–1974, tuše live-lávdástmeh)
• John Wetton – basso (1974–1975, tuše live-lávdástmeh)
• Rick Wills – basso (1975–1976, tuše live-lávdástmeh)
• Gary Tibbs – basso, tuáváášlaavlâ (1979–1980)
• Alan Spenner – basso (1979–1983)
• David O'List – kiitaar (1970–1972)
• Roger Bunn – kiitaar (1971)
• Neil Hubbard – kiitaar (1980–1983)
• Dexter Lloyd – ruumbuh (1971)
• Andy Newmark – ruumbuh (1980–1983)
• Steve Goulding – ruumbuh (1982)
• Dave Skinner – kuoskâttâsčuojânâsah, tuáváášlaavlâ (1980–1983)
• Paul Carrack – kuoskâttâsčuojânâsah, tuáváášlaavlâ (1979–1982)

Fáádást eres soojijn

• Wikimedia Commonsist láá koveh teikkâ eres tiätuvuárháh fáádást Roxy Music.