Kielâ, mii ij kuássin jáámmám
Kielâ, mii ij kuássin jáámmám lii Fabrizio Brecciaroli toimâttem anarâškielâg nooveelantologia, mii almostui juovlâmáánu 7. peeivi 2023.[1] Ton novellijd anarâškielâ sárnooh láá čáállám maaŋgâi iivij ääigi. Taat antologia lii jotkâ Matti Morottaja já Ilmari Mattus toimâttem vuosmuu nooveelantologian Kyelisieidi maccâm já eres novelleh (2005). Čälleeh láá uásild siämmááh ko vuosmuu antologiast-uv, mut taan tove fáárust láá meid maaŋgâi uđđâ čällei teevstah.[1] Kielâ, mii ij kuássin jáámmám lii omâstum anarâškielân já puoh eres-uv ucceeblovokieláid, moh sárnojeh pirrâ maailm. Antologia kuástidmân Anarâškielâ servi lii finnim išeruuđâ Sämitiggeest.[1]
Nommâ
muteAntologia paječaalân lii väljejum Annika Pasasii čäällim nooveel paječaalâ ađai Kielâ, mii ij kuássin jáámmám.[1] Pasasii nooveel muštâl fiktiivlii čaračkielâst, mii lii iäláskittum 25 ive ääigi kriittisii tiileest ellee já ovdáneijee kiellân. Aaibâs tegu čaračkielâ-uv anarâškielâ lii taggaar kielâ, mii ij kuássin jäämi. 1980-lovo loopâst tot lâi uáli jo kriittisii tiileest. Anarâškielâ mätteeh lijjii iänááš puáráseh teikâ koskâahasiih. Maaŋgâ suuvâst kielâsirdem lâi potkânâm, já eenikielâliih párnááh lijjii innig tuše kyevti perrust. Onnáá peeivi tile lii nubenáál. Kielâ lii finnim torvodum saje siärváduvâst, já ton kevttim já sárnoi meeri láá lassaanmin. Veikkâ anarâškielâ iäláskittem lii moonnâm já mana ain-uv eromâš pyereest, te kielâ lii liijká vala uhkevuálááš. Lii kuittâg suijâ oskođ, et juátkojeijee iäláskittempargo áánsust anarâškielâ iälá ige tot kuássin jäämi.
Siskáldâs
muteAntologia siskeeld ohtsis 18 novellid. Vyerdimist láá rähisvuotâmainâseh, science fiction, eeppisiih novelleh já vuosmuu tove meid dekkareh. Novellij kukkodâh mulsâšud muádi siijđost masa 50 siijđon. Fáárust láá sehe fiktiivliih novelleh já novelleh, moh vuáđuduveh tuotâtábáhtussáid. Veikkâ motomijn novellijn láá vuáđđun tuotâtábáhtusah, toh láá kuittâg čallum fiktiivlijn uáinoin. Antologiast novelleh láá uárnejum čällei mield, tastko jieškođe-uv čällest lii jieijâs stijlâ. Čällei juávhust láá sehe eenikielâliih sárnooh já ulmuuh, kiäh sárnuh anarâškielâ viereskiellân. Iänááš čälleid novellij čäällim lii lamaš äigiájánâs, mut motomeh antologian väljejum novelleh láá šoddâm anarâškielâ kuursâi já čäällimpáájái ääigi.[1]