Uvjâ
Uvjâ lii säämi psykososiaallâš torjuu ohtâdâh, mii fáálá sämikulttuur miäldásijd mielâtiervâsvuođâpalvâlusâid sämikielân.[1] Uvjâ vuáđudui kiđđuv 2022 tuárjuđ Suomâ staatâ tuotâvuotâ- já sovâdâttâmkomissiopargo.[1] Palvâlus kulá Laapi pyereestvaijeemkuávlun mielâtiervâsvuođâ já uáivádâspalvâlusâi vuálá.[1]
Palvâlusah
muteUvjâ fáálá ravvim-, toorjâ- já kriisâpargopalvâlusâid, moh láá älkkeht finnimnáál jieijâs eenikielân. Uuvjân puáhtá väldiđ ohtâvuođâ tave-, anarâš-, nuorttâlâš- teikâ suomâkielân. Uvjâ fáálá toorjâsavâstâlmijd anonyymin. Tot fáálá meiddei vuáđutääsi mielâtiervâsvuođâtipšo. Áámmátulmui várás fálloo konsultaatioiše sämikulttuurist já pargoparâporgâm. Palvâlus lii aalmuglâš palvâlus já nuuvtá äššigâsân.[1]
Pargeeh iberdeh sämikulttuur já siärváduv jiešvuođâid, ijge äššigâs taarbâš kevttiđ navcâidis áámmátulmui máttátmân sämmilij já Säämi elimist. Fáádáh pyehtih leđe ovdâmerkkân huolâ jieijâs vaajoost, huolâ skipárist teikkâ aldaulmust, lusis jurduuh, tobdo ete halijdičij savâstâllâđ áámmátulmuin já nuuvt ain. Uvjâ fáálá meid áámmátulmuid konsultaatio já torjuu porgâđ sämiulmuigijn- teikkâ perruigijn.[1]
Ohtâvuođâväldim
muteUuvjâst lii aalmuglâš puhelinpalvâlus, 040 - 6638882, moos Uvjâ västid argâpeeivij 8.00–16.00.[1] Ton lasseen jyehi pargest lii persovnlâš nummeer, moos puáhtá suáittiđ.[1] Pargeeh pargeh miätá Suomâ, já sii puáhtá teivâdiđ ovdâmerkkân jieškote-uvlágán tábáhtusâin.[1] Pargeid puáhtá povdiđ jieškote-uvlágán tábáhtussáid já teivâdmáid.[1] Teivâdmijd puáhtá orniđ njunáluvâi, puhelin peht teikâ káidusin.[2] Lii meiddei máhđulâš orniđ juávkkuteivâdmijd.[2]
Veikkâ Uvjâ lii vuáđudum, vâi tot puávtáččij tuárjuđ Sämmilij tuotâvuotâ- já sovâdâttâmkomissio pargo, ton palvâlusah láá uáivildum puoh sämmiláid, kiäh tarbâšeh psykososiaallii torjuu já tipšom. Nubij sanijguin ohtâvuođâväldimeh iä taarbâš lohtuđ tuotâvuotâ- já sovâdâttâmkomissio paargon, já ohtâvuođâ pyehtih väldiđ meiddei tagareh ulmuuh, kiäh iä uásálist komissio kulâmáid.[2]
Fáádást eres soojijn
muteKäldeeh
mute- ↑ 1,0 1,1 1,2 1,3 1,4 1,5 1,6 1,7 1,8 Lehtola, Henna: Uvjâ fáálá mielâtiervâsvuođâpalvâlusâid sämikielân anarasaavis.fi. 14.12.2023. Čujottum 13.12.2023.
- ↑ 2,0 2,1 2,2 Brecciaroli, Fabrizio: Sämmilij tuotâvuotâ- já sovâdâttâmkomissio toolâi tieđettemtilálâšvuođâ Anarist 27.11.2023 anarasaavis.fi. 30.11.2023. Čujottum 13.12.2023.