Red Dead Redemption 2

Red Dead Redemption 2 lii Rockstar Games ovdedem nk. toimâfiäráánspellâ, mii lii Red Dead -spellârááiđu kuálmád uási speelâi Red Dead Revolver (2004) já Red Dead Redemption (2010) maŋa. Spellâ fáálá máhđulâšvuođâ mulsâšuddâđ vuosmuu já kuálmád persovn uáinui kooskâst. Ton lasseen spellâ siskeeld meid taggaar maŋeláá almostum nettispeelâ, mon pyehtih spellâđ maaŋgah ulmuuh siämmáá ääigi. Tom tobdeh noomáin Red Dead Online.

Red Dead Redemption 2 logo

Red Dead Redemption 2 almostui Playstation 4:n já Xbox Onen roovvâdmáánu 26. peeivi 2018. Microsoft Windowsân tot almostui skammâmáánu 5. peeivi 2019. Red Dead Online -nettispellâ almostui skammâmáánust 2018.

Spellâm

Red Dead Redemption 2 lii toimâfiäráánspellâ, mast lii Rockstar Games ovdebáá speelâ Grand Theft Auto V naalijn máhđulâšvuotâ valjiđ, ete spiällá-uv speelâ vuosmuu vâi kuálmád persovn uáinust. Speelâ maailm lii stuárráb ko Rockstar Games ovdebáin speelâin. Tobbeen láá maaŋgâmuđusiih enâduvah muottiis vaarijn kume čunoiaavijd já lahtâ jeggikuávloid, já toos kulá meid Red Dead Redemption kártá Ovtâstum staatâi piälásâš uási. Uccâ meccikuávlukaavpugij lasseen maailmist lii meid stuorrâ ráhtálâšvuotâlum Saint Denis kaavpug, mii vuáđuduvá tuođâlii maailm New Orleansân. Speelâst joteh enâmustáá hiäppušáin, mut stuárráábij aassâmkuávdái koskâttuvvâi lii máhđulâš jotteeđ ryevdiroođijn. Čääsi alne joteh táválávt suuhâmkárbáin teikkâ lievlâtamppáin.

Viärjuvaljiittâs lii siämmáásullâsâš ko spellârááiđu ovdebáá uásist, já tot siskeeld jieškote-uvmuđušijd revolverijd, pistovlijd, kivárijd já havlâpissoid. Uđđâ viärjun lii tävgipisso. Ton lasseen kyehti kietâpiso lii máhđulâš kevttiđ siämmáá ääigi. Viärjuid ferttee huolâttiđ, mudoi toi iälšu, teividemtärkkivuotâ já vuáimálâšvuotâ huánáneh. Spellâ spiekâst Red Dead Redemptionist nuuvt, ete spellee ij pyevti kyeddiđ räjittemes mere viärjuid fáárust, pic siämmáá ääigi kiävtust pyehtih leđe enâmustáá kyehti kietâassuu já kyehti kiiváármallisâš assuu. Rááiđu ovdebij oosij naalijn tullâtuárust puáhtá ávhástâllâđ Dead-Eye -vuáháduváin, mast äigi hiiđáásm já spellee puáhtá valjiđ tom, maid sun haalijd pääččiđ. Hiđásmem loopâst uáivihuáđđoo pááčá väljejum čuosâttuvâid hirmâd jotelávt. Dead-Eye -tääsi maŋa vuáhádâh čáittá spellei meid vajalij já ellei kriittâlumosijd sisorgaanijd, moi päcimist šadda stuárráámus vaahâg.

Speelâ jiešvuođâin láá viggâm realistlâšvuotân. Spellee ferttee paijeentoollâđ huáđđoo iälšu purâmáin já uáđđimáin. Siämmáánáál ko Grand Theft Auto: San Andreas -speelâst-uv, puurrâm vaaigut huáđđoo tiädun, mast lii vaikuttâs huáđđoo háámán já jiešvuođáid. Spellee puáhtá eelliđ vuoptâčyeppest molsomin jieijâs vuoptâstiijlâ, čuoppâmin vuoptâid teikkâ rahhiimin. Huáđđoo vuoptah já siämu šaddeh ääigi mield ijge kuhheeb vuoptâ- teikkâ siämumaali pyevti valjiđ ovdilgo vuoptah teikkâ siämu lii šoddâm tuárvi ennuv. Kolmâ šooŋâst huáđđoo ferttee kárvudâttâđ pyereest; liijkás uccáá kárvudâttâm hittood huáđđoo tiervâsvuotâ čuággái maccâm. Siämmáánáál kume pirrâsist pihtâsijd ferttee kepidiđ. Nubenáál ko spellârááiđu ovdebáá uásist, taan uásist uáivihuáđđoo pasta vuoijâđ, mutâ sun hevvân jis váibá. Miäcástmist kevttum viärju já luođâ teividemsaje vaigutteh toos, mon ennuv ellee näähkist finnee ruuđâ, ko tom vuábdá. Ovdâmerkkân ko spellee miäcást uccâ elleid, te sun kannat kevttiđ tävgipisso teikkâ uccâ kiiváár.

Maainâs

VÁRUTTÂS:  Taat čaalâ muštâl detaljijd juonâst.

Lii ive 1899. Dutch van der Linde jođettem rikosjuávkku lii karttâm patâriđ Blackwater kaavpugist muottiis vaarijd epiluhostum rievvim maŋa. Vaarijn sij kärttih taištâliđ O´Driscol rikosjuávhoin. Dutch rikosjuávkku rievvee ráhtulâšvuotâmagnaat Leviticus Cornwall juná. Ton keežild Cornwall pálkkát aageent Milton, kiän pargon lii kavnâđ já tolliittiđ Dutch juávhu.

Valentine kaavpugist Dutch juávkku rievvee paaŋki, mut sij kärttih taištâliđ Cornwall juávhoin. Tast maŋa sij värrejeh Lemoyne uásistaatân. Tobbeen ääsih Gray já Braithwate perruuh, main lii ennuv kolle. Dutch já suu juávkku irâtteh toimâđ nuuvt, ete toi perrui kooskâst šodâččij suáti. Tot ij kuittâggin luhostuu. Ráŋgáštâssân Garyh koddeh Sean já Braithwateh tuáppuh Jack, kii lii John Marston kandâ. Dutch rikosjuávkku reagist já koddá kuohtuid perruid, mut ij kaavnâ Jack. Braithwateh lijjii vuábdám Jack italialii Angelo Bronten, kii áásá Saint Denis kaavpugist. Bronte maaccât Jack já ton maŋa táájut Dutch, kii talle puurât suu krokodiiláid.

Hosea Matthews já Dutch orniv paŋkkirievvim Saint Denisist, mut tot ij moonâ aaibâs tegu suoi láin smiettâm já Hosea já Lenny surmâšuv. Dutch van der Linde, Arthur Morgan, Bill Williamson, Javier Escuella já Micah Bell luhostuveh patâriđ kaavpugist tamppáin. Ulmen lâi moonnâđ Kuuban, mut tamppâ kárttá merâstoormân já loppâloopâst almaah riddoneh Guarma-nommâsii suollui. Tobbeen sij uásálisteh eennâmomâsteijei já oorjij koskâsii suátán. Sij išedeh oorjijd vyeittiđ suáđi já talle peesih maasâd Ovtâstum staatáid.

Ovtâstum staatâin almaah kävnih rikosjuávhu eres jesânijd. Dutch ij lah innig vises tast, et sun puáhtá lyettiđ Arthurân, tastko Arthur ij innig tottâl suu. Siämmást Arthur mield Dutch lii muttum já ij lah innig siämmáš olmooš ko ovdil. Sunnuu koskâvuotâ huánnán, ko Ducth koddá Cornwall. Arthur luáttámuš Dutchân láppoo ollásávt já lopâlávt, ko Dutch ij haalijd piäluštiđ Abigail, kote lâi karttâm aageent Milton faŋgân. Arthur lii eres uáivilist já vuálgá Sadiein išediđ Abigail. Arthur piälušt Abigail já koddá aageent Milton. Ovdil jäämmim Milton muštâl Arthurân, et Micah lâi toimâm suu tiätukälden ton rääjist, ko almaah lijjii puáttám maasâd Guarmast.

Ko Arthur máccá Dutch luusâ, te sun suujât Micah tast, et sun lii piättám juávhu. Tast šadda rijdo. Dutch, Micah, Bill Williamson já Javier Escuella láá Arthur já John vuástá. Agenteh kävnih almaid, mut almaah luhostuveh patâriđ. Arthur já John hiäppušeh láppojeh. John halijdičij maccâđ jieijâs perruu kuuvl, mut Arthur halijdičij moonnâđ maasâd já suáládiđ Dutch puoh ruuđâid. Tääl spellee kalga meridiđ tom, mii tábáhtuvá čuávuvâžžân. Mana-uv Arthur Johnáin vâi máccá-uv sun Dutch kuuvl? Loopâst Arthur jáámá, já maht sun jáámá lii kiddâ tast, mon ennuv kunneečuággáh sust láá. Jis sust láá ennuv čuággáh, te sun jáámá tuberkulos keežild. Mudoi Micah koddá suu.

Huáđđooh

• Arthur Morgan lii speelâ uáivihuáđđoo, kii lii lamaš fáárust Dutch van der Linde rikosjuávhust rávásmemave rääjist suullân 20 ive ääigi. Dutch lii annaam suu oppâ kandânis já lii máttááttâm suu luuhâđ, pääččiđ já cevziđ meccikuávlust. Ton keežild Arthur lii hirmâd oskolâš Dutchân.
• Dutch van der Linde lii rikosjuávhu jođetteijee. Jieijâs mielâst sun lii tegu Robin Hood.
• John Marston lii Dutch rikosjuávhu jeessân, kii siämmáánáál ko Arthur-uv lii kuullâm toos rávásmemave rääjist. Maŋeláá sun vuálgá rikosjuávhust Abigail-kálguidiskuin já Jack-kandâidiskuin já kuáđá rikolii eellim. Marshton lii uáivihuáđđoo Red Dead Redemption -speelâst, mast sun jáámá ko littostaatâ agenteh sormejeh suu.
• Aageent Milton lii ohtâ speelâ uáivihuáđđoo vuástálistein.
• Edgar Ross lii Milton išedeijee. Sun jáámá Red Dead Redemption loopâst ive 1914, ko Jack Marston pááčá suu.
• Levictus Cornwall lii ráhtulâšvuotâmagnaat, kiäm Dutch rikosjuávkku rievvee maŋgii.
• Colm O´Driscoll lii irlandlâš rikosjođetteijee já Dutch oovdiš ovtâspargokyeimi.

Juonâčullimeh noheh taas.

Ovdedem

Red Dead Redemption 2 ovdedii Rockstar Games puoh studioh. Spellâmotorin kevttui finnoduv jieijâs Rockstar Advanced Game Engine (RAGE). Woody Jackson, kii lâi nuottim uásild Red Dead Redemption, maacâi nuottiđ jotkâuási. Speelâ almostittem maŋedii kuohtii: algâaalgâst spellâ lâi tárguttâs almostittiđ ive 2017 pelimuddoost, mut almostittem sirdii kiiđân 2018. Kuovâmáánust 2018 almottii, ete speelâ almostittem sirdâšuvá roovvâdmáánun 2018.

Red Dead Online -nettispeelâ beta-versio almostui skammâmáánu 27. peeivi 2018, já tom lehâstii puoh spelleid skammâmáánu 30. peeivi.

Markkânistem

Rockstar Games almostitj roovvâdmáánu 16. peeivi 2016 Twitterist kove, mast lâi finnoduv logo siämmáálágán ruopsis tuáváást ko Red Dead Redemption lokkekooveest. Tast šoddii tállán markkânsaavah Red Dead -spellârááiđu máhđulii jotkâuásist. Roovvâdmáánu 16. peeivi Rockstar Games piejâi speelâ virgálávt almosin já almottij, ete vuosmuš trailer almostuvá roovvâdmáánu 20. peeivi. Čohčâmáánu 28. peeivi 2017 almostui nubbe trailer. Kuálmád trailer almostittempeivi lâi vyesimáánu 2. peeivi 2018. Vuosmuš spellâm oovdânpyehtee trailer almostui porgemáánu 9. peeivi, já nubbe uási roovvâdmáánu 1. peeivi. Majemuš trailer ovdil almostittem poođij roovvâdmáánu 18. peeivi.

Fáádást eres soojijn

• Wikimedia Commonsist láá koveh teikkâ eres tiätuvuárháh fáádást Red Dead Redemption 2.