Murray Sinclair
Murray Sinclair (24. uđđâivemáánu 1951 Selkirk, Manitoba, Kanada – 4. skammâmáánu 2024 Winnipeg, Manitoba, Kanada)[1] lâi kanadalâš politikkár, tuámmár já äššivyeijee. Sinclair lâi algâaalmugij vuoigâdvuođâi já sovâdâttâmviggâmušâi piälušteijee. Sun puovtij oovdân Kanada asâttâhškovlâsysteem tuotâvuođâ já uđâsmittij eennâm vuoigâdvuođâvuáháduv.[2]
Murray Sinclair algâaalmuglâš nommâ lâi Mizhana Gheezhik (anarâškielân tot, kote sárnu kuuvijn almeest).[2]
Eellim já pargo
muteMurray Sinclair šoodâi Selkirkist, Manitobast, Kanadast uđđâivemáánu 24. peeivi 1951.[1] Sust šoodâi Manitoba vuossâmuš algâaalmuglâš tuámmár ive 1988. Suu eellimpargon šoodâi lopâttiđ tagarijd epivuoigâdvuođâid, maid maaŋgah algâaalmugeh kuáhtájeh kolonialismpolitiik keežild. Sun stivrij Kanada tuotâvuotâ- já sovâdâttâmkomissio, mii selvâttij kuuđâ ive ääigi eennâm asâttâhškoovlâi tábáhtuumijd. Komissio kavnâttij ive 2015, ete Kanada lâi hárjuttâm "kulttuurlii aalmugmorhe" politiik. Loppâraportist árvuštâlloo, ete paijeel 4 100 párnážid jammii tavdáid, kuáridem tiet já jiešsorme peht. Sinclair arvâlij, et tuođâlâš loho saatij leđe joba 15 000.[2]
Sinclair paasij iäláttâhân ive 2021. Ive 2022 sun uážui Order of Canada -kunneemeerhâ algâaalmugij vuoigâdvuođâi já rijjâvuođâi piäluštmist. Order of Canada lii Kanada alemus kunneemerkkâ, mii mieđettuvvoo Kanada aalmugjesânân, kote lii merhâšitteht ovdedâm kunneemeerhâ läättinkielâlii moto Desiderantes meliorem patriam (anarâškielân pyereeb eejieennâm haalijdmáin).[2]
Murray Sinclair jaamij Winnipegist, Manitobast, Kanadast skammâmáánu 4. peeivi 2024.[1]
Fáádást eres soojijn
mute
Wikimedia Commonsist láá koveh teikkâ eres tiätuvuárháh fáádást Murray Sinclair.
- Murray Sinclair Internet Movie Databasest (eŋgâlâskielân)
Käldeeh
mute- ↑ a â b Murray Sinclair The Canadian Encyclopedia. Čujottum 20.11.2024. (eŋgâlâskielân)
- ↑ a â b c Kanada algâaalmuglâš tuámmár Murray Sinclair lii jáámmám anarasaavis.fi. 21.11.2024. Čujottum 20.11.2024.