Čäcisäplig

Čäcisäplig (Arvicola amphibius ovdil Arvicola terrestris) lii Koskâ- já Tave-Euroopist sehe Taveviestâr-Aasiast tiättojeijee jursseešlaajâ. Čäcisäplig ij lah rávhuidittum šlaajâ Suomâst.

Čäcisäplig Arvicola amphibius (Linnaeus, 1758)
Tile	LC (eellimvuáimálâš)
Tile Suomâst	LC (eellimvuáimálâš)
Tieđâlâš luokittâllâm
Doomeen	Sellâvááimusliih Eucarya
Kodde	Elleekodde Animalia
Uáiviráiđu	Savosuonâsiih Chordata
Vyeliráiđu	Čielgitávtáliih Vertebrata
Luokka	Njomâtteijeeh Mammalia
Lahko	Jursseeh Rodentia
Vyelilahko	Säpliglágáneh jursseeh Myomorpha
Pajehiäimu	Muroidea
Hiäimu	Cricetidae
Vyelihiäimu	Muoldâgeh Arvicolinae
Suuhâ	Čäcisäpligeh Arvicola
Šlaajâ	amphibius

Olgohäämi

Čäcisäplig lii muoldâgin viehâ styeres já kuhesseeibâg. Ton rummâš kukkodâh lii 11–21 cm, já seeibi kukkodâh lii 6–13 cm. Čäcisäplig tiäddá suulân 70–280 g. Ton almolâš ivne lii tevkkâd. Selgipeeli puáhtá leđe meid čappâd, já čuávjipeeli lii kuovgâdub – motomin ruopsisruškâd.

Lavdâm já eellimpiirâs

Čäcisäplig lavdâm

Čäcisäplig lii vijđásávt levânâm šlaajâ. Viestârist tot tiättoo Ranskaast já Britanniast, kost ton eellimkuávlu juátkoo Euroop já Ruošâ čoođâ Siberian Lenajuuvâ liähán já Baikaljáávrán. Tavveen čäcisäplig tiättoo tave näpikiärdu räi já mäddin Iranist já Aldanuorttân. Suomâst čäcisäpligeh tiättojeh Suomâluovtâst aainâs-uv Oulu aloduv räi.

Čäcisäplig lii vuáháduvvee šlaajâ já tot iälá jieškote-uvlágánijn eellimpirrâsijn juuvâi, viirdij já jeegij pirrâ. Čäcisäplig tiättoo meid motomin niijtoin, piälduin já muorâkaardijn. Keessiv šlaajâ mákkoo lahtâ kuávluin já čääsi aldavuođâst, tego jeegijn já aijuin. Lii uáinistâm, ete tälviv čäcisäplig värree koške kuávlun, kost tot áásá koške enâmân kuáivum vuovdâin.

Lattim

Čäcisäplig vuájá pyereest já máttá meid puohčâđ, mutâ olgojiešvuovij tiet tot ij lah vuáhádum čäcielimân. Čäcisäplig iälá táválávt eennâmvuálááš vuovdâin, mutâ sáttá eelliđ meid tulve kárdum poovnâst tâi čääsist leijee mievtâst. Čäcisäplig kuáivumpargoin šoddâm lejeh láá siämmáálágáneh ko eennâmsäplig kuáivum lejeh.

Raavâd

Čäcisäplig ravâdin láá puohlágáneh šadoh já toi uásih. Motomin čäcisäplig puáhtá puurrâđ elleeraavvâd. Tot porá muorâi veedijd, motomin meid koorâid sehe jävriruávuid, jävrihoošijd já vuojâraasijd. Čäcisäplig norá ruotâsšaddoid já ruonnâsijd eennâmvuálááš vuággusis.

Lasanem

Čäcisäpligist láá maaŋgah piäsáduvah keessiv, main pyehtih leđe 2–9 čivgâd. Táválávt čiivgah láá kuittâg 4–6. Vuosmuš piäsádâh šadda cuáŋui-vyesimáánust já eidu šoddâm čiivgâid puáhtá uáiniđ vala čohčâmáánust-uv. Piäju lii táválávt eennâm vyelni, mutâ čäcisäplig puáhtá rähtiđ piäjus meid čääsi pirâstittem mievtâst. Čäcisäplig šadda suhâjuátkimahan kyevti mánuppaje ahasâžžân, mii meerhâš tom, ete tooláá kiđđuv šoddâm čiivgah pyehtih lasaniđ vala siämmáá ive ääigi.