Vyevdičiävžui

Vyevdičiävžui (Tringa ochropus) lii uccâ subarktâsâš kalâččeijee lodde, mii kulá čevžui suuhân já sulâstit-uv joráduvvii.

Vyevdičiävžui 'Tringa ochropus (Linnaeus, 1758)
Tile	LC (eellimvuáimálâš)
Tile Suomâst	LC (eellimvuáimálâš)
Tieđâlâš luokittâllâm
Doomeen	Sellâvááimusliih Eucarya
Kodde	Elleekodde Animalia
Uáiviráiđu	Savosuonâsiih Chordata
Vyeliráiđu	Čielgitávtáliih Vertebrata
Luokka	Lodeh Aves
Lahko	Riddolodeh Charadriiformes
Vyelilahko	Kalâččeijeeh Charadrii
Hiäimu	Miähástuvah Scolopacidae
Suuhâ	Čevžuuh Tringa
Šlaajâ	ochropus

Puárásumos Suomâst riegistum vyevdičiävžui lii lamaš 5 ive, 9 mánuppaijeed já 2 peeivi puáris. Euroop puárásumos lii lamaš brittilâš vyevdičiävžui, mii lii lamaš aainâs-uv 11 ihheed já 6 mánuppaje puáris.

Stuárudâh já tobdomeerhah

Vyevdičiävžui lii 20–24 cm kukke já tiäddá 75–85 g. Ton suájákejij koskâ lii 39–44 cm.

Lavdâm

Vyevdičevžuu lavdâm

Vyevdičiävžui lii jotteelodde, mii pessee Euroop já Aasia subarktâsâš kuávlust já tálvástâl Maadâ-Euroopist, Maadâ-Aasiast já Afrikist. Tot puátá Suomân cuáŋuimáánust já kirdel máádás jo kesimáánust porgemáánu loopân räi. Suomâst vyevdičevžuuh pessejeh 50 000–80 000 paarrâd já ubâ Euroop unionist 150 000–200 000 paarrâd.

Anarist ton tiettumsajeh láá Avveeljuvpiällá kuosâvyevdih, Čaarmâuáivái kuosâvyevdih já Lemmeeleevist Ergijävri já Rovâdâsjävri. Ton pessiimist Anarist ij lah tiätu.

Pessim já lasanem

Tringa solitaria já vyevdičiävžui láá áinoo čevžuuh, moh piervâldeh muorâst. Táválávt vyevdičevžuu piervâld rástágáá piervâlist teikkâ uárree porrust. Vyesimáánust niŋálâs mannee 4 mane já kuohtuuh vaanhimeh läälliv moonijd, távjá 20–23 peivid. Uđâgááh vyelgih piervâlist 3–4 oho ahasâžžân.

Kovegalleria

• 
• 
  Vyevdičevžuu maneh
• 
• 

Fáádást eres soojijn

• Wikimedia Commonsist láá koveh teikkâ eres tiätuvuárháh fáádást Vyevdičiävžui.