Talking Heads

Talking Heads lâi ovtâstumstaatâlâš rockjuávkku, mii tooimâi iivij 1974–1991. Juávkun kullii David Byrne (laavlâ, kiitaar), Chris Frantz (ruumbuh), Jerry Harrison (kuoskâttâsčuojânâsah, kiitaar) já Tina Weymouth (basso).

Talking Heads
Talking Heads 1970-lovo loopâst. Mietipiäiván čižetpeln (paijeen): David Byrne, Jerry Harrsion, Chris Frantz já Tina Weymouth.
Tiäđuh
Aktiivlâžžân	1974–1991
Stijlâšlaajâ	new wave post-punk funkrock worldbeat poprock
Päikkisaje	New York, Ovtâstum staatah
Lávlumkielâ	eŋgâlâskielâ
Jesâneh	David Byrne, laavlâ, kiitaar Jerry Harrison, kuoskâttâsčuojânâsah, kiitaar Tina Weymouth, basso Chris Frantz, ruumbuh
Skiärrufinnodâh	Sire, EMI

Juávhu tobdosumoseh pitáh láá ovdâmerkkân "Psycho Killer", "Once in a Lifetime", "This Must Be the Place", "Burning Down the House", "And She Was", já Al Green -cover "Take Me to the River".

Historjá

Talking Heads vuáđudii Rhode Island School of Designist uáppeeh lávloo-kitarist David Byrne, rumbal Chris Frantz já basist Tina Weymouth ive 1974. Kyehti ive maŋeláá juávkun servij kuoskâttâsčuojâtteijee já kitarist Jerry Harrison, kii lâi čuojâttâm Modern Lovers -juávhust. Ive 1977 juávkku finnij sopâmuš Sire Recordsist já almostitij vuosâalbumis Talking Heads: 77. Album finnij mielâstumvuođâ sehe huámmášume eromâšávt Byrne sanniittâsâi já omâs lávlumstijlâ tiet.

Čuávuvâš album More Songs About Buildings and Food (1978) pyevtittij keččâlâddâmvuálásâš elektronisâš muusikistis kulostum Brian Eno, kote lâi čuojâttâm tolebáá Roxy Musicist já porgâm oovtâst muusik ovdâmerkkân David Bowiein. Album lâi váhá funk-stijlâsâš já siskeldij keččâlem elektronisâš instrumentijguin.

Ive 1979 almostum Fear of Musicist juávkku kevtiškuođij vala-uv eenâb funk-stiijlâ já vaaldij fáárun meid afriklâš polyriitmâid. Afriklâš ritmâmuusikáin, funkáin já elektronisâš muusikáin keččâlmist šoodâi sii tobdosumos album Remain in Light (1980). Eno lâi oppeet pyevtitteijen, nuuvt ko kyevti oovdeb-uv albumist. Fáárun lijjii puáttám meid maaŋgah lasečuojâtteijeeh tego posonjâsčuojâtteijeeh sehe šleđgâkitarist Adrian Belew.

Kuhes turnee maŋa juávhu jesâneh vuoijuu sooloprojektáid muádi ihán. Ive 1983 almostui uđđâ album Speaking in Tongues, mast Eno ij lamaš innig fáárust. Album siskeeld Remain in Light ritmâlâšvuođâ, mut ton pitáh láá váhá oovtâkiärdánuboh já pop-stijlâsuboh. Album almostittem maŋa juávkku algâttij uđđâ turnee, mon oovtâ konsertist rahtii elleekove Stop Making Sense.

Čuávuvâš album Little Creatures (1985) sehe čuávuváá ive True Stories lijjii uáli pop-stijlâseh. Maajeeb album pitáh láá Byrne siämmáánommâsâš elleekooveest. Majemuu albumist Naked (1988) juávkku maacâi funk- já worldbeat-stiijlân. Talking Heads pieđgânij virgálávt ive 1991, mut ij lamaš toimâm aktiivlávt Naked almostittem maŋa.

Diskografia

• Talking Heads: 77 (1977)
• More Songs About Buildings and Food (1978)
• Fear of Music (1979)
• Remain in Light (1980)
• Speaking in Tongues (1983)
• Little Creatures (1985)
• True Stories (1986)
• Naked (1988)