Taažâ Sämitige vaaljâpirrâduvah (ive 2009 rääjist)

Taažâst Sämitige vaaljâpirrâduvah láá lamaš ive 2009 sämitiggevaaljâi rääjist čiččâm. Vaaljâpirrâduvâin jienâvuoigâdvuotâ lii tagarijn ulmuin, kiäh tobbeen ääsih já kiäh láá merkkejum Taažâ sämitige vaaljâluvâttâlmân ton vaaljâpirrâdâhân.

Taažâ Sämitige táálááh vaaljâpirrâduvah:

  1. Nuorttâkuávlu vaaljâpirrâdâh

  2. Ávjuvääri vaaljâpirrâdâh

  3. Tavekuávlu vaaljâpirrâdâh

  4. Väričokkekuávlu vaaljâpirrâdâh

  5. Viestârmeerâ vaaljâpirrâdâh

  6. Maadâ-Säämi vaaljâpirrâdâh

  7. Maadâ-Taažâ vaaljâpirrâdâh

Historjá

Ivveest 1989 ihán 2005 Taažâ sämitiggevaaljâin lijjii 13 vaaljâpirrâdâhhâd, mut taat vuáhádâh nubásmittui ovdil ko ive 2009 sämitiggevaaljah uárnejuvvojii. Ive 2009 rääjist láá lamaš tuše 7 vaaljâpirrâdâhhâd.

Onnáá peeivi sämitiigán väljejuvvojeh vaaljâin 39 sämitiggeairâsid. Ovdil vuod vaaljâin väljejuvvojii 43 sämitiggeairâsid. Jyehi vaaljâpirrâduvvâst väljejuv sämitiigán kyehti airâs. Tast maŋa loopah 25 mandaatid juáhhojeh koskâvuođâlávt puoh vaaljâpirrâduvâi kooskâst täi olmoošlovo vuáđuld nuuvt, ete Maadâ-Taažâ vaaljâpirrâduvvâst iä väljejuu vaaljâin ohtsis eenâb ko 6 sämitiggeairâs.

Nuorttâkuávlu vaaljâpirrâdâh

Nuorttâkuávlu vaaljâpirrâdâhân ađai vaaljâpirrâdâhân 1 kuleh ohtsis oovce kieldâd Finnmarkist. Toos kuleh tääl ovdii Vaarjâg vaaljâpirrâduv kieldah ađai Maadâ-Vaarjâg, Uunjargâ, Čäcisuálui, Várgááh já Båtsfjord, ovdii Tiänu vaaljâpirrâduv kieldah ađai Tiänu, Berlevåg já Gamvik sehe Lebesby ovdii Porsaŋg vaaljâpirrâduvvâst.

Ávjuvääri vaaljâpirrâdâh

Ávjuvääri vaaljâpirrâdâhân ađai vaaljâpirrâdâhân 2 kuleh ohtsis kulmâ kieldâ Finnmarkist. Toos kuleh ovdiih Kárášjuv já Kuovdâkiäinu vaaljâpirrâduvah sehe Porsaŋg kieldâ ovdii Porsaŋg vaaljâpirrâduvvâst.

Tavekuávlu vaaljâpirrâdâh

Tavekuávlu vaaljâpirrâdâhân ađai vaaljâpirrâdâhân 3 kuleh ohtsis 10 kieldâd, čiččâm Finnmarkist já kulmâ Tromsist. Vaaljâpirrâdâhan kuleh oovdii Alta/Kvalsund vaaljâpirrâduv kieldah Kvalsund, Hammerfest, Alta, Hasvik já Lappea, ovdii Porsaŋg vaaljâpirrâduv kieldah Tavenjargâ já Moseija já ovdii Tave-Tromsa vaaljâpirrâduv kieldah Kierua, Návuonâ já Raisi.

Väričokkekuávlu vaaljâpirrâdâh

Väričokkekuávlu vaaljâpirrâdâhân ađai vaaljâpirrâdâhân 4 kuleh ohtsis 10 kieldâd Tromsist: Kaivuonâ, Omasvuonâ, Yykeä, Kalsa, Tromssa, Paccvuonâ, Målselv, Bardu, Senja já Raisivuonâ. Ovdil ive 2020 vaaljâpirrâdâhân kullii meid Lenvik, Berg, Torsken já Tranøy kieldah.

Viestârmeerâ vaaljâpirrâdâh

Viestârmeerâ vaaljâpirrâdâhân ađai vaaljâpirrâdâhân 5 kuleh ohtsis 34 kieldâd. Vaaljâpirrâdâhan kuleh ovdii Tave-Tromsa, Koskâ-Tromsa já Maadâ-Tromsa vaaljâpirrâduvâi kieldah eereeb Raisivuonâ, mii kulá Väričokkekuávlu vaaljâpirrâdâhân.

Maadâ-Säämi vaaljâpirrâdâh

Maadâ-Säämi vaaljâpirrâdâhân ađai vaaljâpirrâdâhân 6 kuleh puoh ovdii Maadâ-Säämi vaaljâpirrâduv kieldah, moh iä kuulâ vaaljâpirrâdâhân 5 ađai Nordland lääni kieldah, moh láá Ranast já Rødøyst máádás, Trøndelag lääni kieldah sehe Engerdal, Rendalen, Os, Tolga, Tynset já Folldal Innlandet läänist. Täi lasseen ovdii Maadâ-Taažâ vaaljâpirrâduv Surnadal já Sunndal kieldah Møre já Romsdal lääniist kuleh meid tááláá vaaljâpirrâdâhân.

Maadâ-Taažâ vaaljâpirrâdâh

Maadâ-Taažâ vaaljâpirrâdâhân ađai vaaljâpirrâdâhân 7 kuleh puoh Taažâ kieldah, moh láá Trøndelagist máádás, eereeb Surnadal, Sunndal já Rindal Møre já Romsdalist sehe Rendalen, Os, Tolga, Tynset já Folldal Hedmarkist. Puoh eres kieldah kuleh Maadâ-Säämi vaaljâpirrâdâhân.