Suvi West
Suvi West ađai Doavtter-Piera Suvi Máret (š. uđđâivemáánu 14. peeivi 1982, Kittâl, Suomâ) lii sämmilâš dokumentelleekovestivrejeijee já kietâčällee.
Eellim já karrieer mute
Suvi West viettij nuorâvuođâs Ucjuuvâst. Ko sun lâi ucce, sun halijdij šoddâđ čaittâleijen teikkâ toimâtteijen. Sun juuđij luvâttuv Tamperest, kost sun luuvâi kreatiivlii linjá. Iivij 2000–2007 sun lâi toimâtteijen Yle Sámi Radiost Anarist já Taažâ almosradio NRK:st, kost sun poorgâi televisiouđđâsij já dokumentij rähten. Taat pargo kuittâg aatâštškuođij suu, tastko televisiost láá uáli jo čovgâ njuolgâdusah já sun halijdij eenâb rijjâvuođâ pargostis.[1]
Iivij 2003–2005 sun luuvâi mediasyergi linjá Säämi máttááttâskuávdáást. Suu loppâpargo lâi Vaikein niitä on rakkaus -dokument, mii kieđâvuš huumor peht kandâskippáár uuccâm. Ulmuuh pessii keččâđ fiilmâ meiddei Hollywoodist já Vancouver filmâfestivaalist.[1]
Sun varrij Helsigân pargo tiet. Sun raahtij oovtâst Anne Kirste Aikioin Märät säpikkäät -huumorohjelm, mii siskeeld skeecijd, sahhiittâlmijd já pegâlmâs syemmilijd lavluid sämikielâlij sanijguin.[1] Elleekuuvij rähtim lasseen iivij 2009–2011 sun poorgâi Algâaalmugij elleekovekuávdáá Skábma jođetteijen, já sun lii toimâm dokumentfiilmâ maisterohjelmist Aalto ollâopâttuvvâst ive 2015 rääjist. Sun aasâi Helsigist ohtsis love ihheed, mon maŋa sun varrij maasâd tavas, tastko sun aibâšij päikkisaajees.[1]
West stivrij Eatnameamet – Min jaskes dáistaleapmi -dokumentelleekove, mii muštâl Suomâ politiikist sämmilij kuáttá já tast, maht sämmiliih taistâleh jieijâs kulttuur oovdân. Dokument vuoitij Kirho Mediasiättus palhâšume já keččei palhâšume Tampere elleekovefestivaalist.[1]
Suvi West stivrij Máhccan – Kotiinpaluu -elleekove, mii muštâl repatriaatiost, adai maht museotiiŋgah macâttuvvojeh algâaalgâláid omâsteijeid. Toin naalijn pááikán máccá meid uási saje historjá já aalmug kulttuur. Elleekove čuávu tom, maht sämmiliih museotiiŋgah määcih Sáámán. Elleekove lâi maaŋgâin almugijkoskâsijn filmâfestivaalijn já ožžui meiddei Jussi-palhâšume iävtukkâsvuođâ.[2]
Filmografia mute
Taat lii Suvi West filmografia:[3]
- 2012 – Märät säpikkäät / Njuoska bittut tv-ráiđu
- 2016 – Sparroabbán
- 2018 – Juuret on uánihisfilmâ
- 2019 – The Killing of Čáhcerávga uánihisfilmâ
- 2021 – Eatnameamet - Min jaskes dáistaleapmi
- 2023 – Máhccan
Käldeeh mute
- ↑ 1,0 1,1 1,2 1,3 1,4 Suvi West on uurastanut dokumenttielokuvia kansansa eteen, mutta sielun sopukoissa muhii unelma komediasta Tiedonjulkistamisen neuvottelukunta. Čujottum 28.1.2024. (suomâkielân)
- ↑ Oululaisen Vaski Filmin Máhccan – Kotiinpaluu on ehdolla vuoden parhaan dokumenttielokuvan Jussi-palkintoon Mun Oulu. 26.1.2024. Čujottum 28.1.2024. (suomâkielân)
- ↑ Suvi West IMDb. Čujottum 28.1.2024. (eŋgâlâskielân)
