South Park (SP) lii ovtâstumstaatâlâš satiirilâš animaatioráiđu, mii muštâl Ovtâstum staatâiColorado uásistaatâst leijee South Park kaavpug tábáhtusâin. Rááiđu uáivihuáđđooh láá nelji vyeliškovlâahasii kaandâ: pyeidis já karodeijee Eric Cartman, juudalâškandâ Kyle Broflovski, kievhis peruu pärni Kenny McCormick já koskâluokkalii ameriklâšperruu pärni Stan Marsh. Teemamuusik rááiđun lii ráhtám Primus. Rááiđust láá rahtum meid maaŋgah videospeelah já miälduspyevtittâsah.
Mottoomlágán ‘’South Park’’ versio rahtui ive 1992, ko Trey Parker já Matt Stone rahtijn uánihiselleekove, mast Jeesus taištâlij iällááttum morhedeijeemuotâäijih vuástá. Forgâ sunnust koijâdii laseelleekuuvijd. Stone já Parker rahtijn juovlâelleekooveest uđđâ versio, mast Jeesus vuástálisten lâi juovlâstáálu. Elleekoveh levânii Internetist. Parker já Stone finnijn maaŋgâid ohtâvuotâväldimijd elleekovefinnoduvâin, já forgâ Comedy Central faalâi pyevtittiđ puáttee rááiđu. South Park áánsust Comedy Central piäluštui koŋkursist.
Stanley "Stan" Marsh suuvâst muštâleh ucánjáhháá eenâb ko rááiđu eres kaandâi suuvâin. Stan peerâ lii stereotyyppisii ameriklâšperruu parodia. Suu eeji já eeni lasseen rááiđust láá meid suu viehâváldálâš päniruovdijd kevttee stuorrâuábbi Shelley, čeeci Jimbo Kern, kiäst lii jieijâs asâkävppi, äijih “Grandpa” Marvin Marsh já homoseksuaallâš peenuv Sparky. Stan pala Shellyst, já Shelly vaajeed Stan. Stan lii Kyle Broflowski pyeremus skippáár.
Kyle Broflowski lii Stan pyeremus skippáár. Meiddei Kyle já Stan eejih lává pyeremuuh skipáreh. Kyle lii juudalâš. Kylest láá ruopsis vuoptah, maid sun vaajeed. Ton keežild sun viggá kevttiđ kappeer, mii luávdá taid. Kyle vaanhimeh lává Sheila já Gerald Broflowski.
Eric Theodore Cartman lii juávhu pyeidimus kandâ. Sun lii raasist já karrood uáli ennuv. Cartmanist lává kyehti jiellâh: kissá, mon nommâ lii Mr. Kitty, já šahe, mon nommâ lii Fluffy. Cartman vaajeed puoh olmoošjuávhuid, main sun ij lah fáárust.
Kenneth "Kenny" McCormick tobdeh tast, et rááiđu vuossâmuin puovtâdâspoojijn sun jaamij masa jyehi uásist. Sun sárnu nuuvt, ete lii távjá vaigâd iberdiđ, maid sun iätá. Kenny lii juávhu kievhimus kandâ. Sun áásá hirmâd hyenes visteest, já suu vaanhimeh lává pargottemes juhheeh.
Leopold "Butters" Stotch lii viiđâd uáivihuáđđoo. Sun ij lah veltihánnáá jyehi uásist, mut sust lii kuittâg kuávdášlâš roolâ maaŋgâin oosijn. Butters lii nánnáá, tájuttettee já ucánjáhháá káinulâš.
