Saammâl já čuoškah
Saammâl já čuoškah (eŋgâlâskielân Sammeli and the Mosquitoes) lii kuuđâd uási käävciuásásii kyevtkielâg Rumbu-kirjerááiđust. Kirjerááiđu čällee já kovvejeijee lii eŋlandlâš kirječällee Lee D. Rodgers.[1][2] Kirjeráiđu muštâl aanaarsämmilâš kaandâst, kiän nommâ lii Saammâl. Sun lii nuorâ kandâ, kii lijkkoo fiäránáid já Säämi mulsâšuvvee iveaigijd.
Taan kirje maainâs lohtâšuvá loppâkiäsán. Mainâsist Saammâl keččâl navdâšiđ kesiehidijn nuuvt ennuv ko máhđulâš. Čuoškah kale meid navdâšeh, já Samâlist lii toiguin tuotâ killáámuš. Tast álgá suu fiäráán, mon feeriidijn sun uáppá skipárijdis iššijn, et aašijn láá ain kyehti pele.[3]
Kirje almostui ive 2019. Tot lii čallum sehe anarâškielân já eŋgâlâskielân. Kirjeest kielah láá paldâluvâi, vâi kielâid puávtáččij viärdádâllâđ. Anarâškielâlii uási lii jurgâlâm Petter Morottaja.[1] Taam kirje já rááiđu eres-uv kiirjijd lii kuástidâm Anarâškielâ servi ry.
Käldeeh
mute- ↑ 1,0 1,1 Nettisaje - Wiki anarâškielâst já kulttuurist Čujottum 9.9.2021
- ↑ Lapland8seasons - Bookshelf Čujottum 9.9.2021
- ↑ Saammâl já čuoškah — Sammeli and the Mosquitoes. Lee. D. Rodgers. Anarâškielâ servi ry. 2019