Perâvárdám

Perâvárdám lii Suomâ várdájeijei toimâhäämi, mon aktiviteeteh láá uáivildum perruid. Ulmen lii faallâđ ohtâsii tooimâ ubâ perrui várdámlihâstâs áárvui mield, ige vyelediđ várdámlihâstâs ahemuddo-ohjelm algâttemave. Ulmen lii meiddei puđâldiđ oovtâst luándust uccâ párnáid heivejeijee vuovijn. Perâvárdámân iä lah miäruštâllum sierânâs šoddâdemulmeh, já toimâ tábáhtuvá várdámlihâstâs almolij áárvui já šoddâdemuulmij mield. Perâvárdámtooimâ tubdâldâhhân lii uárree.

Perâvárdám ij lah várdámlihâstâs eidusâš šoddâdemtoimâ. Tot lii perruu ohtâsâš uápásmemmätki várdámtooimân. Nubij sanijguin tot fáálá perruid máhđulâšvuođâ uápásmuđ toos, mii várdámlihâstâs lii. Perruuh uápásmuveh eidusii várdámtooimân rávhálávt já jieijâs taavtâ mield om. uásálistmáin lippukode muhhijd, leiráid já eres tábáhtussáid.

Perâvárdámtooimân pyehtih uásálistiđ puoh perruuh, main láá vuálá škoovlâ ahasiih päärnih. Perâvárdámohjelm aktiviteeteh láá vuávájum 3–6-ihásáid parnijd. Perruuh pyehtih uásálistiđ perâvárdámtooimân nuuvt kuhháá ko tain láá vuálá škoovlâ ahasiih päärnih. Tooimâ puáhtá algâttiđ meiddei jo ovdil ko puárásumos pärni tiävdá kulmâ ive. Nuorâbeh päärnih pyehtih uásálistiđ tooimâm jieijâs ovdánemtääsi mield.

Perâvárdámist toimâohtâdâh lii ubâ peerâ, ige pärni tâi rävisolmooš. Perâvárdámjuávkun kuleh perruuh, ađai päärni já ucemustáá oovtâ rävisulmuu hammim ohtâduvah. Perâvárdámjuávhu stivrejeijen puáhtá toimâđ ohtâ já siämmáš olmooš, tâi ovdâsvástádâs jieškote-uv aašijn juáhhoo tooimân uásálistee rävisulmui kooskân. Ideaaltiileest perâvárdámstivrejeijest lii hárjánem lippukoddeest.