Museokorttâ
Museokorttâ lii Suomâ museoi ohtsâš siisâpeessâmlippu. Ton lasseen tot lii hiätukorttâ, moin finnee maaŋgâlágán vuáládâsâid museoi ulguubeln-uv. Aalgâ rääjist tavemus museo, moos korttáin piäsá, lii lamaš Säämimuseo Siida.[1]
Historjá
muteMuseokoortâ vuáđudij Suomâ museolitto Vuáládâhenâmij siämmáálágán museokoortâ, ive 1981 vuáđudum Museumkaart vuáđuld.[2][1]
Suomâst museolito korttâ valdui anon vyesimáánu 5. peeivi 2015.[3] Talle peesâi 154 museon já oovtâ ive korttâ maavsij 54€.[4] Vuossâmuu kyevti mánuppaajeest vuábdojii jo paijeel 9 000 korttâd.
Ive 2022 keesi räi museokorttáin lii máhđulâš eelliđ mestâ 340 saajeest.[5] Tastmaŋa korttáin piäsá eenâb museoid, já tondiet hadde lii tivrâsub. Tääl ihekorttâ máksá 74€ uđâsin já 69€, jis uđâsmit puáris koortâ.[6]
Toimâmalli
muteMuseokoortâ vyebdimpuáđuh macâttuvvojeh museoid kolliistâlleemeeri vuáđuld. Ton lasseen museokorttâ-vuáháduv paijeentoollâm- já ovdánemkoloh ruttâduvvojeh uásild tain puáđuin, moh šaddeh koortâi vyebdimist.[7][8]
Museokoortâ tooimâ hoittáá FMA Creations Oy, mon oomâst Suomen museoliitto ry.[9]
Njuolgâdusah
muteKorttâ lii persovnlâš já tot lii vyeimist 12 mánuppaje ääigi vuossâmuu kevttimpeeivi rääjist. Ko korttâ lii vyeimist, te toin puáhtá eelliđ Suomâst puoh museoin, main korttâ tohhee máksuniävvun, já veikkâ jyehi peeivi, jis haalijd. Siämmáá museost puáhtá eelliđ liijká tuše ohtii pirrâmpeeivist.
Vaikuttâsah
muteMuseokoortâ aneh miänástum vyehhin movtijdittiđ ulmuid kolliistâllâđ museoin.[8] Ive 2018 korttâhaldâšeijee eelij museost koskâmiärálávt suulân ohcii ive ääigi.[10]
Museokorttâ lii meid nubásmittám, maht ulmuuh kolliistâleh museoin. Korttâhaldâšeijeeh pyehtih ovdâmerkkân elâččiđ museost siisâpeessâmliipu mävsihánnáá já keččâđ tuše uási museočuágálduvvâst, jis nuuvt halijdeh.[11] Sij pyehtih meid kolliistâllâđ siämmáá museost teikkâ čáitálduvvâst maŋgii.[8][12] Ton lasseen ulmuuh láá kolliistâlškuáttám tagarijn museoin, main sij iä veltihánnáá kolliistâlâččii, jis ličij ferttim uástiđ siisâpeessâmliipu.[11]
Aalto-ollâopâttuv tutkâmuš mield koortâ áánsust museoin eelih eenâb já eenâb ulmuuh já museoh finnejeh eenâb puáđuid. Ton maŋa ko museokorttâ valdui anon, museoin kolliistâlmeh láá lamaš jyehi ive ulâttâsmeeri.[13]
Fáádást eres soojijn
mute- Museokoortâ virgáliih nettisiijđoh (suomâkielân)
Käldeeh
mute- ↑ 1,0 1,1 Sundqvist, Janne: Museoihin pääsee kohta yhdellä kortilla – kävijäluvut halutaan pohjoismaiselle tasolle Yle. 28.4.2015. Čujottum 7.4.2022. (suomâkielân)
- ↑ Museumkaart / Museumjaarkaart Museum van de Twintigste Eeuw. Čujottum 8.4.2022. (hollandkielân)
- ↑ Museokortti tänään 5-vuotias – suomalaiset rakastuivat museoihin museot.fi. 5.5.2020. Čujottum 7.4.2022. (suomâkielân)
- ↑ Frilander, Aino: Yhdellä kortilla pääsee ensi kesästä alkaen 154 museoon Helsingin Sanomat. 12.12.2014. Čujottum 7.4.2022. (suomâkielân)
- ↑ Mahtava museokevät tulossa – katso lista kaikista uusista Museokortti-kohteista! museot.fi. 25.3.2022. Čujottum 7.4.2022. (suomâkielân)
- ↑ Mitä saan Museokortillani vuonna 2022? museot.fi. 27.12.2021. Čujottum 7.4.2022. (suomâkielân)
- ↑ Avainlukuja Museokortista museot.fi. Čujottum 8.4.2022. (suomâkielân)
- ↑ 8,0 8,1 8,2 Museokortin ensimmäiset 3 vuotta: ennätyksiä, isoja lukuja ja positiivista palautetta sttinfo.fi. 4.5.2018. Čujottum 8.4.2022. (suomâkielân)
- ↑ FMA Creations Oy: FMA Creations Oy - Etusivu www.fmac.fi. Čujottum 8.8.2018. (suomâkielân)
- ↑ Museokortti on hitti – nyt kokeilussa oma kortti turisteille mtv.fi. Čujottum 7.8.2018. (suomâkielân)
- ↑ 11,0 11,1 Mansikka, Heli: Museokortti teki kulttuuri-Eilasta piipahtelijan Yle. 4.8.2015. Čujottum 8.4.2022. (suomâkielân)
- ↑ Viljanen, Kaisa: Vuoden täyttävä Museokortti on lisännyt maksettuja museokäyntejä: ”Korttia vain vilauttaa ja se on siinä” Helsingin Sanomat. 5.5.2016. Čujottum 8.4.2022. (suomâkielân)
- ↑ Puukka, Päivi: Museokortti kolminkertaistaa kortin omistajan museokäynnit – Tutkimuksen mukaan myös museoiden tulot kasvoivat Yle Uutiset. 30.10.2019. Čujottum 8.4.2022. (suomâkielân)
