Ive 2024 Suomâ presidentvaaljah
Ive 2024 Suomâ presidentvaaljah láá presidentvaaljah, moh uárnejuvvojii Suomâst uđđâive- já kuovâmáánust 2024. Njuolgâ vaaljâin väljejui Suomâ 13. president kuuđâ ive pajan ađai iivij 2024–2030. Tallaš president Sauli Niinistö ij lamaš iävtukkâssân vaaljâin, tastko sun lâi jo toimâm kyehti paje maŋaluvâi Suomâ presidentin.
Ko ij kihheen iävtukkâsâin finnim paijeel pele adelum jienâin, te vaaljâin uárnejui meid nubbe rieggee kuovâmáánu 11. peeivi 2024. Taam jienâstemrieggee vuoitij Stubb, kii finnij 51,6 % jienâin.[1] Sun algâttij Suomâ täsivääldi 13. presidentin njuhčâmáánu 1. peeivi 2024.[2]
Jienâvuoigâdvuotâ
muteJienâvuoigâdvuotâ lii puoh Suomâ aalmugjesânijn, kiäh láá tiävdám 18 ihheed majemustáá uđđâivemáánu 28. peeivi 2024.[3][4] Aassâmsaje ij vaaigut jienâvuoigâdvuotân.[4]
Iävtukkâsah
mute-
2. Li Andersson (Čižetlitto) -
3. Olli Rehn (Suomâ Kuávdášpiäládâh já väljejeijeeservi) -
4. Harry Harkimo (Liike Nyt) -
-
-
-
-
-
10. Pekka Haavisto (Ruánáá litto já väljejeijeeservi)
.jpg)
_(cropped).jpg)
.jpg)
_(cropped).jpg)
.jpg)
.jpg)
Vaaljâi jienâstemrieggeeh
muteVuossâmuš jienâstemrieggee
muteVaaljâi vuossâmuš jienâstemrieggee munejienâstem uárnejui Suomâst uđđâivemáánu 17.–23. peeivij 2024 já olgoenâmijn uđđâivemáánu 17.–20. peeivij 2024. Munejienâstmist adeluvvojii 1 945 236 jiennâd.[5][6] Alexander Stubb finnij 550 136 jiennâd ađai 28,3 % puoh jienâin, já Pekka Haavisto 501 263 jiennâd ađai 25,8 % puoh jienâin.[5][6]
Munejienâstem maŋa lâi vala eidusâš vaaljâpeivi, mii uárnejui uđđâivemáánu 28. peeivi 2024.[7][8] Vaaljâpeeivi Stubb finnij ucceeb jienâid (331 977 jiennâd ađai 25,6 % puoh jienâin) ko Haavisto, kii finnij talle 335 094 jiennâd ađai 25,8 % puoh jienâin.
Munejienâstmist já vaaljâpeeivi Stubb finnij ohtsis 882 113 jiennâd ađai 27,2 % puoh adelum jienâin, já Haavisto 836 357 jiennâd ađai 25,8 % puoh adelum jienâin.[9] Kuálmádin poođij Jussi Halla-aho (19,0 %), já niäljádin Olli Rehn (15,3 %). Jieškote-uv čuávuváin viiđâ iävtukkâsâst finnij vuálá 5,0 % jienâin: Li Andersson (4,9 %), Jutta Urpilainen (4,3 %), Mika Aaltola (1,5 %), Sari Essayah (1,5 %) já Harry Harkimo (0,5 %). Taat meerhâš, ete enâmustáá jienâid finnim iävtukkâskyevtis Stubb já Haavisto lává iävtukkâssân nube rieggest.
| Iävtukkâsnummeer | Nommâ | Jienah munejienâstmist | % | Jienah vaaljâpeeivi | % | Ohtsis | % |
|---|---|---|---|---|---|---|---|
| 2 | Andersson, Li | 104 223 | 5,4 | 54 105 | 4,2 | 158 328 | 4,9 |
| 3 | Rehn, Olli | 301 706 | 15,5 | 194 812 | 15,0 | 496 518 | 15,3 |
| 4 | Harkimo, Harry | 9 708 | 0,5 | 7 305 | 0,6 | 17 013 | 0,5 |
| 5 | Halla-aho, Jussi | 314 191 | 16,2 | 301 296 | 23,2 | 615 487 | 19,0 |
| 6 | Urpilainen, Jutta | 99 451 | 5,1 | 41 351 | 3,2 | 140 802 | 4,3 |
| 7 | Aaltola, Mika | 34 011 | 1,7 | 13 415 | 1,0 | 47 426 | 1,5 |
| 8 | Stubb, Alexander | 550 136 | 28,3 | 331 977 | 25,6 | 882 113 | 27,2 |
| 9 | Essayah, Sari | 30 547 | 1,6 | 17 273 | 1,3 | 47 820 | 1,5 |
| 10 | Haavisto, Pekka | 501 263 | 25,8 | 335 094 | 25,8 | 836 357 | 25,8 |
Alexander Stubb lâi puoh pivnohumos iävtukkâs puohnissii 84 kieldâst, Pekka Haavisto 39 kieldâst já Jussi Halla-aho 78 kieldâst. Kištoost niäljádin pááccám Olli Rehn lâi pivnohumos 108 kieldâst.[10][11]
Kuálmádin šoddâm Jussi Halla-aho lâi pivnohumos Laapi já Satakunta vaaljâpirrâduvâin já niäljádin šoddâm Olli Rehn Oulu vaaljâpirrâduvâst. Eres vaaljâpirrâduvâin vuosmužžân šoodâi jo-uv Stubb teikâ Haavisto.[10][11]
Stubb finnij jienâid eromâšávt ruotâkielâlii riddokuávlust. Korsnäsist sun finnij joba 60,2 prosentid jienâin. Haavisto pelestis finnij alemuid kyedittemlovoidis Åland vaaljâpirrâduvâst. Sun lâi meid vuosmuš stuorrâ kaavpugijn: Helsigist, Tuurkust, Tamperest já Oulust.[10][11]
Syemmiliih jienâstii uáli aktiivlávt: 74,9 prosentid jienâstemvuoigâdvuođâlijn ulmuin jienâstii vuosmuu jienâstempaje ääigi jo-uv muuneeld teikâ eidusii vaaljâpeeivi ääigi.[10][11]
Nubbe jienâstemrieggee
muteKo iävtukkâsâin ohtâgin ij finnim paijeel pele adelum jienâin, te vaaljâin uárnejui nubbe rieggee, mast lijjii sehe munejienâstem já eidusâš vaaljâpeivi, kuás lâi máhđulâš jienâstiđ mielâmield iävtukkâs Suomâ presidentin.[10] Taan rieggest iävtukkâssân láin Alexander Stubb já Pekka Haavisto.[9][10]
Vaaljâi nube jienâstemrieggee munejienâstem uárnejui Suomâst uđđâivemáánu 31.–kuovâmáánu 6. peeivij 2024 já olgoenâmijn uđđâivemáánu 31.–kuovâmáánu 3. peeivij 2024.[8] Munejienâstmist adeluvvojii 2 027 383 jiennâd.[12] Alexander Stubb finnij munejienâstmist 1 063 298 jiennâd ađai 52,8 % puoh jienâin, já Pekka Haavisto 952 279 jiennâd ađai 47,2 % puoh jienâin.[12] Munejienâstem jienâin 11 806 jiennâd hilgojii ađai tuše 0,6 % puoh jienâin.[12]
Munejienâstem maŋa lâi vala taan rieggee vaaljâpeivi, mii uárnejui kuovâmáánu 11. peeivi 2024.[10] Vaaljâpeeivi Stubb oppeet finnij ucceeb jienâid (511 913 jiennâd ađai 49,4 % puoh jienâin) ko Haavisto, kii finnij talle 524 269 jiennâd ađai 50,6 % puoh jienâin.
Munejienâstmist já vaaljâpeeivi Stubb finnij ohtsis 51,6 % jienâin já Haavisto 48,4 % ađai Stubb vuoitij taam jienâstemrieggee já sust šoodâi Suomâ täsivääldi 13. president.[1] Sun algâttij president virgeest njuhčâmáánu 1. peeivi 2024.
| Iävtukkâsnummeer | Nommâ | Jienah munejienâstmist | % | Jienah vaaljâpeeivi | % | Ohtsis | % |
|---|---|---|---|---|---|---|---|
| 8 | Stubb, Alexander | 1 063 298 | 52,8 | 511 913 | 49,4 | 1 575 211 | 51,6 |
| 10 | Haavisto, Pekka | 952 279 | 47,2 | 524 269 | 50,6 | 1 476 548 | 48,4 |
Sämikuávlu kieldâin kuulmâ kieldâst (Iänudâh, Aanaar já Suáđigil) Stubb čokkij eenâb jienâid, já Ucjuuvâst vist Haavisto vuoitij. Sämikuávlu kieldâin presidentiävtukkâsâi jienah juáhášuvvii čuávuvávt:[13]
- Iänodâh: 53,7 % Stubb – 46,3 % Haavisto
- Aanaar: 50,3 % Stubb – 49,7 % Haavisto
- Ucjuuhâ: 53 % Haavisto – 47 % Stubb
- Suáđigil: 55,9 % Stubb – 44,1 % Haavisto
Ubâ Laapi vaaljâpirrâduvâst, ko puoh jienah lijjii rekinistum, Haavisto čokkij 50,8 % jienâin.[13]
Fáádást eres soojijn
mute
Wikimedia Commonsist láá koveh teikkâ eres tiätuvuárháh fáádást Ive 2024 Suomâ presidentvaaljah.
Käldeeh
mute- ↑ 1,0 1,1 Peltonen, Topias, Karhu, Otso, Hankaniemi, Anu Leena, Piirainen, Elli, Kangas, Laura já Mannermaa, Jaakko: Kaikki äänet on laskettu: Stubb 51,6 prosenttia, Haavisto 48,4 prosenttia Yle Uutiset. 11.2.2024. Čujottum 11.2.2024. (suomâkielân)
- ↑ Länsman, Kaija: Stubb presideantan – ná Sámis jienastedje Yle Säämi. 12.2.2024. Čujottum 12.2.2024. (tavesämikielân)
- ↑ Täsivääldi president vaaljâ 2024 Vaalit.fi. Vyerkkejum 25.1.2024. Čujottum 29.1.2024.
- ↑ 4,0 4,1 Presidentvaaljâ pasepeeivi 28.1.2024 Suomâ riehtiministeriö. 10.1.2024. ”Puáttee vaaljâin jienâvuoigâdvuođâliih láá aassâmsaajeest sorjohánnáá puohah Suomâ aalmugjesâneh, kiäh láá tiävdám 18 ihheed majemustáá 28.1.2024.” Čujottum 29.1.2024.
- ↑ 5,0 5,1 Presidentinvaalit 2024 — Tulospalvelu Yle Uutiset. Čujottum 28.1.2024. (suomâkielân)
- ↑ 6,0 6,1 6,2 Presidentinvaali 2024, 1. vaali Suomâ riehtiministeriö. 28.1.2024. Čujottum 28.1.2024. (suomâkielân)
- ↑ Olthuis, Marja-Liisa: Presidentvaaljâi vaaljâpeivi lii pasepeeivi 28.1.2024 Anarâš aavis. 26.1.2024. Čujottum 28.1.2024.
- ↑ 8,0 8,1 Teâđaid presideʹnttvaalin da jiõnstummšest (Tiäđuh presidentvaaljâst já jienâstmist) (Siijđo nommâ lii feilâlávt nuorttâlâškielân, mut sijđo lii kal anarâškielân.) Vaalit.fi. Vyerkkejum 25.1.2024. Čujottum 28.1.2024.
- ↑ 9,0 9,1 Heiskanen, Pietu: Tässä on presidentinvaalien ensimmäisen kierroksen tulos Yle Uutiset. 28.1.2024. Čujottum 28.1.2024. (suomâkielân)
- ↑ 10,0 10,1 10,2 10,3 10,4 10,5 10,6 Olthuis, Marja-Liisa: Stubb já Haavisto presidentvaaljâi nube jienâstmân Anarâš aavis. 29.1.2024. Čujottum 29.1.2024.
- ↑ 11,0 11,1 11,2 11,3 Näin Suomi äänesti – tämä juttu paljastaa yksityiskohdat Yle Uutiset. 29.1.2024. Čujottum 2.2.2024. (suomâkielân)
- ↑ 12,0 12,1 12,2 12,3 Presidentinvaali 2024, 2. vaali Suomâ riehtiministeriö. 11.2.2024. Čujottum 11.2.2024. (suomâkielân)
- ↑ 13,0 13,1 Tulospalvelu | Miten alueellasi äänestettiin? Helsingin Sanomat. 11.2.2024. Čujottum 12.2.2024. (suomâkielân)