Coco Chanel
Gabrielle Bonheur “Coco” Chanel (19. porgemáánu 1883 Saumur, Ranska – 10. uđđâivemáánu 1971 Pariisi, Ranska) lâi ranskalâš pivtâssundáttellee, nisonij muoti pälgisliäkkoo já finnodâhnissoon, kii vuáđudij muotitáálu Chanel ive 1910. Sun lâi Ranska ohtâ haute couture -muoti njunošnoomâin masa kutlov ihheed.[1] Suu kočodeh motomin vuosmužžân modernnisonin.[2]
.jpg)
1920-lovvoost Coco Chanel muivij muotimaailm, ko ij miettâm kevttiđ korsettijd já eres ton ääigi nisonáid sundáttâllum unohâs pihtsijd. Sun sundáttâlâi pihtsijd, main lijjii vaiguttâsah almai pihtâsij materiaalijn já čuoppâmijn, mutâ moh lijjii eleganteh oovtkiärdánvuođâinis. Klassisâš jakkupiivtâs já ucc’čappâd láá-uv šoddâm suu kieđâin. Pihtâsij lasseen suu tobdeh meid Chanel No. 5 -parfyymist.[3]
Eellim mute
Gabrielle Bonheur Chanel šoodâi porgemáánu 19. peeivi 1883 Saumurist, Ranskaast jottee kävppijâsâi kievhis perrui. Suu enni Jeanne Devolle jaamij ko Chanel lâi tuše 12-ihásâš, mast maŋa eeči Albert Chanel vuolgâttij suu uárbásij pááikán Aubazinen[4], kost nunáh pajasšoddâdii suu já suu kyehti uábi. Chanel kyehti viiljâ eeči adelij nube perrui.[5] Nunnáin nuorâ Coco oopâi kuárruđ.[6]
Karrieer mute
Tast maŋa ko Chanel 18-ihásâžžân vuolgij uárbistáálust, lâi sun mottoom ääigi pargoost lávlon. Ton pargoost sun uážui jiellâhnoomâs Coco.[7][4]
Ive 1910 Chanel vuáđudij hattâpuuvdâ "Chanel Modes" Pariisi kuávdážân 21 rue Cambonân, alda Place Vendôme já Rue du Faubourg Saint-Honoré. Jotelávt sun uážui peggim hattârähten, já vijđedškuođij tooimâs.[8] Sun rähtiškuođij meid pihtsijd, já sundáttâlâi oovdâst ovttáin Ranska čepimuin parfyymvalmâšteijein, Ernst Beauxáin, Chanel No. 5 -parfyym, mii almostui ive 1921. Parfyym iššijn Chanel muotitáálu árvu 1920-lovo loopâst rekinistui jo miljovnijn, já tast lijjii paijeel 2 000 parged.[1]
Chanel populaarkulttuurist mute
Coco Chanel elimist láá ráhtám čaaitâlm já jieškote-uvlágánijd kiirjijd já elleekuuvijd.[2]
Teatter mute
- Ive 1969 rahtui musikaal Chanel elimist, mast Katharine Hepburn čaittâlij Chanel.
Elleekoveh mute
- Coco Chanel (2008)
- Coco avant Chanel (2009)
- Coco Chanel & Igor Stravinsky (2009)
Fáádást eres soojijn mute
Wikimedia Commonsist láá koveh teikkâ eres tiätuvuárháh fáádást Coco Chanel.
Käldeeh mute
- ↑ 1,0 1,1 Coco Chanel | Britannica www.britannica.com. Čujottum 8.4.2022. (eŋgâlâskielân)
- ↑ 2,0 2,1 La Ferla, Ruth: The Mother of Reinvention The New York Times. Čujottum 8.4.2022. (eŋgâlâskielân)
- ↑ Coco Chanel ja Igor Stravinsky taiteilevat vain taustalla Yle. Čujottum 8.4.2022. (suomâkielân)
- ↑ 4,0 4,1 Holm, Niina: Coco Chanelin itse tehty elämä Helmet. Čujottum 8.4.2022. (suomâkielân)
- ↑ Picardie, Justine: The secret life of Coco Chanel Telegraph. Čujottum 8.4.2022. (eŋgâlâskielân)
- ↑ Biography com Editors: Coco Chanel Biography. Čujottum 8.4.2022. (eŋgâlâskielân)
- ↑ Judith Warner: Was Coco Chanel a Nazi Agent? The New York Times. 2.9.2011. Čujottum 8.4.2022. (eŋgâlâskielân)
- ↑ CHANEL: 31 RUE CAMBON THE STORY BEHIND THE FACADE CHANEL. Čujottum 26.4.2022. (eŋgâlâskielân)