Aanaar Pride
Aanaar Pride lii aanaarlij pridefestivaal, mii Aanaar nuorâistivrâ uárnee jyehi keesi Anarist.[1] Tot lii ubâ Suomâ tavemus Pride.[2]
Historjá mute
Vuossâmuš Aanaar Pride uárnejui syeinimáánu 2. peeivi 2022.[3] Fáruluvâi jottee juávkku vuolgij Sale-käävpi oovdâst já moonâi Aanaar markkân čoođâ Saijoos šiljo räi. Tastmaŋa ehidist lijjii jieškote-uvlágáneh konserteh, sahâvuáruh já savâstâlmeh. Iärásij lasseen lávdástii Kaisla Suomisii bändi Pain in the Balls sehe Amandaid, kii lii Suáđigilist vuálgus leijee musikkár. Ohjelmân kuulâi meiddei tánssámpáájá. Tábáhtusân uásálistii suulân 100 olmožid.[2]
Nubbe Aanaar Pride uárnejui porgemáánu 5. peeivi 2023. Tábáhtus aalgij ráiđuväzzimáin tme 13:00 Säämimuseo já luándukuávdáš Siida oovdâst. Ráiđu juuđij Aanaar markkân peht sämikulttuurkuávdáš Sajosân, kost ohjelm jotkui tme 17:30 räi. Tábáhtusâst lávdástii muusikjuávkku Freak Out! já lávloo Lyyti, mon lasseen lyevi lâi ávusin puohháid konsertij maŋa (nk. Open stage). Ohjelmist lâi meiddei el. piknik, tiätukišto, siärvuslii taiđuu rähtim, savâstâllâm sehe räsivierâi já piinsij rähtim.[1]
Käldeeh mute
- ↑ 1,0 1,1 Mattus-Kumpunen, Ulpu: Aanaar Pride uárnejuvvoo lávurduv Anarâš aavis. 3.8.2023. Čujottum 3.8.2023.
- ↑ 2,0 2,1 Brecciaroli, Fabrizio: Vuossâmuš Aanaar Pride -tábáhtus Loostâš 03/2022. Anarâškielâ servi ry. Čujottum 3.8.2023.
- ↑ Seurujärvi, Sáárákáisá: Keejâ kuuvijd vuossâmuš Aanaar Pridest: Uárnejijeeh vuordii tuše váhá uásálisteid, mut uásálistei stuorrâ meeri olâttij Yle Säämi. 4.7.2022. Čujottum 3.8.2023.