Varriistâllâm
Varriistâllâm lii anarâšâi toovláš aassâmvyehi, mast ulmuuh onnii sehe tälvi- et kesipääihi. Tälvipäikki lâi mecciláá suáijáás vyevdikuávlust, já tobbeen lijjii puáldimmuorah já jäävvilenâmeh já puásuikuáttum ergijd. Kesipäikki vist lâi kyeličaasij alda. Kesipääihist ulmuuh meid šoddâdii potásijd já navrâsijd já čuoppii kamâssuoinijd. Táválávt anarâšâin lijjii ohtâ teikâ kyehti kesipääihi kuálástem, miäcástem já käärji toollâm tiet. Jis ohtâ jävri adelij hyenebeht kyelisalâsijd, te talle kesipääihih lijjii eenâb. Tälvipääihih lijjii pyerebeht rahtum ko kesipääihih.
Varrimmääđhih lijjii motomin uánihááh, suullân 3–5 kilomeetter, mut motomeh määdhih lijjii muádi-uv penâkkullâm kukkosiih. 1910-lovvoost nyevt 20 perrud varriistâllii. Ulmuuh värrejii távjá majemui sijvoi ääigi, mut ko eennâmtuálu mottoom muudon ovdánij, te varrim kesipááikán maŋanui tommittáá, et pottáák kiergânij kolvuđ meiddei tälvipááikán. 1950- já 1960-lovoin kesipááikán peesâi varriđ iäskán talle ko párnááh lijjii peessâm škoovlâst kesiluámun. Jis varriđ puovtij časij mield, te lussâduboh tävireh já ucebeh párnááh jođettuvvojii kárbáin. Nissoonviehâ jođettii enâmij mield šivettijd puárásub párnáiguin.[1] Motomin meid piätuelleeh tego kuumpih sátustâllii värrejeijeid.
Varriistâllâm tábáhtui iänááš vääzin já suuvân já uđđâsub ääigi motomijn perruin meid traktoráin. Fáárun váldojii purrâmušverkki tego jáávuh já sukkâreh já meid pihtâseh. Párnáid kesipááikán varriistâllâm lâi ain hävskis já vuordum tábáhtus.[2]
Anarâšah láá varriistâllâm Päärtih kuávlust kesi- já tälvipaihij kooskâ ain 1970-lovo räi, majemuuh vala 2000-lovo aalgâkeččin. Ko aassâm čokkânškuođij piäđguiaassâmkuávluin čuákkipaihijd, láá ovdiih aassâmsajeh pááccám suvváid taan ääigi kesipäikkisullâsâš aassâmsaijeen.[1]
Puohah suuvah iä lah kuittâg varrim.
Käldeeh mute
- ↑ 1,0 1,1 Jefremoff, Irja: Anaras - Iäláttâsah - Varriistâllâm www.samimuseum.fi. Čujottum 29.5.2022.
- ↑ Kerttu Paltto sahhiittâllâm arenan.yle.fi. Čujottum 29.5.2022.