Suomâ ovdâskodde

Suomâ ovdâskodde (suomâkielân eduskunta já ruotâkielân riksdagen) lii Suomâ oovtkáámmársâš parlament já alemus staatâorgaan. Ovdâskoddeest láá 200 aalmugovdâsteijed, kiäh väljejuvvojeh koskâvuođâlâš ovdâskoddevaaljâin. Taah vaaljah tuállojeh neelji ive kooskâi.

Ovdâskode pargoh

Ovdâskodde kiävttá laavâasâttemvääldi já meerrid meid staatâekonomiast. Haldâttâsvääldi kevttih täsivääldi president sehe staatârääđi ađai haldâttâs, mon jesânijn kalga leđe ovdâskode luáttámuš.

Ovdâskodde väljee staatân haldâttâs uáiviminister, mon täsivääldi president noomât taan paargon. Haldâttâs eres ministerijd president noomât uáiviminister iävtuttâs mield.

Ovdâskode kuávdáš pargo lii laavâi asâttem. Uđđâ laavâ tâi vyeimist leijee laavâ nubástus puáhtá pieijâđ joton stiivrâ iävtuttâssáin, aalmugovdâsteijee lahâalguin tâi aalmuglâšalguin. Lahâiävtuttâsah kieđâvuššojeh vistig ovdâskode váljukuudijn já maŋeláá olesčuákkimist, moos uásálisteh puoh aalmugovdâsteijeeh.

Ovdâskodde ráhtá staatâ budjet kalenderihán häävild. Ton lasseen ovdâskodde västid sehe staatâ ekonomia já budjet čuávumist. Ovdâskoddeest lii toimâväldi meid aalmugijkoskâsijn aašijn.