Saoirse Ronan
| Saoirse Ronan | |
|---|---|
_(cropped).jpg)
| |
| Persovntiäđuh | |
| Šoddâm | cuáŋuimáánu 12. peeivi 1994 |
| Bronx, New York, New York, Ovtâstum staatah | |
| Karrieer | |
| Aktiivlâžžân | 2003– |
| Merhâšittee roolah | Atonement Brooklyn Lady Bird Little Women |
| Palhâšumeh | |
| Nissoonuáiviroolâ Golden Globe 2018 Lady Bird | |
| Iävtukkâsvuođah | |
| Pyeremuu nissoonuáiviroolâ Oscar 2016 Brooklyn | |
| Lasetiäđuh | |
| Nommâčáálus | 
|
| IMDb-sijđo | IMDb |
Saoirse Úna Ronan (iättoo /ˈsɜrʃə ˈuːnə ˈroʊnən/; š. 12. cuáŋuimáánu 1994 Bronx, New York, New York) lii irlandlâš-ovtâstumstaatâlâš čaittâleijee. Sun lii roolâidiskuin vuáittám maaŋgâid palhâšuumijd tego oovtâ Golden Globe. Sust láá ohtsis meid nelji Oscar-iävtukkâsvuođâ já vittâ Bafta-iävtukkâsvuođâ.[1]
Eellim mute
Saoirse Úna Ronan šoodâi Bronxist New Yorkist. Suu vanhimeh láin varrim Dublinist Ovtâstum staatáid 1980-lovvoost, já ko Ronan lâi 3-ihásâš, sij varrii maassâd Irlandân. Ronanist lii-uv sehe Ovtâstum staatâi já Irland aalmugjeessânvuotâ.[2]
Irlandist Ronan juuđij váhá ääigi Ardattin National School, mutâ mudoi suu vanhimeh máttááttáin suu pääihist. Suu nommâ Saoirse meerhâš "rijjâvuotâ".[3]
Karrieer mute
Ronan karrieer aalgij ko sun pärnin čaittâlij TV-rááiđust The Clinic iivij 2003–04. Tast maŋa sun finnij roolâ rikosrááiđust Proof ive 2005. Siämmáá ive kovvejui meid I Could Never Be Your Woman, mast Ronanist lii suu vuosmuš elleekoveroolâ. Elleekove ij kuittâg almostum ko esken kyehti ive maŋeláá.
Vuosmuu Oscar-iävtukkâsvuođâ Ronan finnij ive 2007 suu roolâst elleekooveest Atonement, mast sun čaittâl 13-ihásii Briony Tallis, kii ibbeerd puástud suu stuorrâuábi roomaans já kieleest vaahâglâš čuávumušâigijn.[4]
Tast maŋa sun lii čaittâlâm ovdâmerkkân Peter Jackson stivrim elleekooveest The Lovely Bones (2009), Wes Anderson elleekooveest The Grand Budapest Hotel (2014), John Crowley elleekooveest Brooklyn (2015) já kyevti Greta Gerwig stivrim elleekooveest: Lady Bird (2017) já Little Women (2019).[5] Sun lâi meid nommâroolâst elleekooveest Hanna (2011), mon láá uásild kuvvim Suomâst Rukast.[6]
Fáádást eres soojijn mute
Wikimedia Commonsist láá koveh teikkâ eres tiätuvuárháh fáádást Saoirse Ronan.
Käldeeh mute
- ↑ Saoirse Ronan IMDb. Čujottum 13.4.2022.
- ↑ Saoirse Ronan Forbes. Čujottum 13.4.2022. (eŋgâlâskielân)
- ↑ Saoirse Ronan thegentlewoman.co.uk. Čujottum 13.4.2022. (eŋgâlâskielân)
- ↑ Saoirse Ronan | Biography, Movies, & Facts | Britannica www.britannica.com. Čujottum 13.4.2022. (eŋgâlâskielân)
- ↑ Saoirse Ronan www.goldenglobes.com. Čujottum 13.4.2022.
- ↑ Hollywood-trilleriä kuvataan Rukalla Yle Uutiset. 16.3.2010. Čujottum 13.4.2022. (suomâkielân)