Stephen King
| Stephen King | |
|---|---|
| |
| Šoddâm | čohčâmáánu 21. peeivi 1947 Portland, Maine |
| Pargo | |
| Áámmát | kirječällee |
| Noomah | Stephen King Richard Bachman |
| Kirjálâšvuođâ šlaajâ | kaavhâ, triller |
| Kielâ | eŋgâlâskielâ |
| Peerâ | |
| Vanhimeh | Donald já Nellie Ruth Pillsbury King |
| Pelikyeimi | Tabitha Spruce (vihkâm 1971) |
| Párnááh | Naomi Rachel King Joe Hill Owen Phillip King |
| Lasetiäđuh | |
| Nommâčáálus | 
|
| Päikkisijđo | StephenKing.com |
Stephen Edwin King (š. čohčâmáánu 21. peeivi 1947, Portland, Maine, Ovtâstum staatah) lii ovtâstumstaatâlâš kirječällee.
Eellim mute
Stephen King šoodâi Portlandist, Mainest. Suu vaanhimeh, Donald já Nellie Ruth Pillsbury King, iäránáin, ko King lâi vala ucce. Viljâinis Davidáin suoi aasáin tast maŋa sunnuu ennijn. Sij varriistâlii vistig tuohuteehi ovdilgo monnii maassâd Mainen já paccii tohon.
King juuđij Durham vuáđuškoovlâ já Lisbon Falls luvâttuv, kost sun valmâštui ive 1966. Sun čaalij aktiivlávt jo talle. Luvâttuv maŋa King peesâi siisâ Maine ollâopâttâhân luuhâđ eŋgâlâskielâ, kost sun valmâštui ive 1970. Pargo ij kuittâggin kavnum tállân, pic esken čohčuv 1971, kuás sun algâttij eŋgâlâskielâ máttáátteijen Hampden Academyst. Ehidij já oholoopâi sun čaalij novellijd já pargeldij meid romanijn.
King naajâi Tabitha Sprucein ive 1971. Suoi láin teivâm Maine ollâopâttuvvâst, kost kuohtuuh láin lamaš uáppen. Sunnust láá kulmâ päärni já nelji pärnipäärni.[1]
Karrieer mute
Kiđđuv 1973 Doubleday & Co. tuhhiittij King roomaan Carrie almostittem várás. Sunjin muštâlui, ete jis tot vuábdoo pyereest, te sust lii máhđulâšvuotâ kyeđđiđ suu pargo máttáátteijen já tuše čäälliđ. King jieijâs mielâst maainâs škovlâpiävuttum nieidâst kiäst láá telekineetliih vyeimih ij lamaš pyeri já sun leggistij-uv vistig tom roskeliitán. Suu kálgu, Tabitha, kuittâg kuáivui tom tobbeen já kivrij kállás vuolgâttiđ tom kuástideijei. Nuuvt Carrie almostui kiđđuv 1974.[2]
1980-lovvoost King lâi sorjolâš sehe kokaiinist já alkoholist. Tot vaaigutškuođij meid suu čälimân já suu jieijâs mielâst The Tommyknockers (suom. Kolkuttajat) lii-uv suu hyenemus kirje. Tot lâi majemuš kirje, mon sun čaalij ko lâi vala sorjolâš. Tast maŋa sun kuođij kokaiin já alkohol.
Richard Bachman mute
Richard Bachman lâi Stephen King pseudonyym suu karrieer aalgâst. Suu kuástideijee lâi ton uáivilist, ete oovtâ čällest ij pyevti almostuđ maŋgâ kirje ivveest. Maŋeláá King ij innig perustâm taggaar njuolgâdusâst já sust sattii almostuđ kulmâ-uv kirje oovtâ ive ääigi.
King filmiistmeh mute
King kiirjijn láá rahtum paijeel 100 elleekovveed já maaŋgah tv-rááiđuh. Ohtâ pivnohumosijn elleekuuvijn lii Stanley Kubrick stivrim The Shining (suom. Hohto), moos King jieš ij lijkkum ollágin, ko suu mielâst kirjes lâi tulkkum puástud. Sun ij meid lijkkum toos, ete Jack Nicholson čaittâlij uáivipersovn, Jack Torrance, ige tooskin ete Torrance lii váhá jollâ aalgâ rääjist. Elleekove lâi King mielâst meid váhá misogynistlâš, ko nissoon tast lâi tuše kehnittes piškee.
Eres King mainâsij vuáđuld rahtum pegâlmâs elleekoveh láá ovdâmerkkân The Shawshank Redemption (1994), The Green Mile (1999) já It (2017). It-roomaan vuáđuld rahtui meid tv-miniráiđu jo ive 1990.
Käldeeh mute
- ↑ The Author StephenKing.com (eŋgâlâskielân)
- ↑ Kauhun kuningas heitti esikoiskirjansa roskiin – tiesitkö nämä 10 asiaa Stephen Kingistä? Yle 21.9.2017, čujottum 19.5.2020 (suomâkielân)