Maya Angelou
| Maya Angelou | |
|---|---|
.jpg)
| |
| Šoddâm | 4. cuáŋuimáánu 1928 Saint Louis, Missouri, Ovtâstum staatah |
| Jáámmám | 28. vyesimáánu 2014 Winston-Salem, Tave-Carolina, Ovtâstum staatah |
| Pargo | |
| Áámmát | kirječällee, tivtâsteijee, aalmuglâšriehtiaktivist |
| Kielâ | eŋgâlâskielâ |
| Peerâ | |
| Pelikyeimi | Tosh Angelos (1951—1954) Paul du Feu (1974—1983) |
| Párnááh | 1 |
| Lasetiäđuh | |
| Päikkisijđo | mayaangelou.com |
Maya Angelou (š. Marguerite Annie Johnson; 4. cuáŋuimáánu 1928 St. Louis, Missouri, Ovtâstum staatah – 28. vyesimáánu 2014 Winston-Salem, Tave-Carolina, Ovtâstum staatah) lâi maaŋgâpiälálâš ovtâstumstaatâlâš kirječällee. Sun čaalij tiivtâid, muštâlusâid, čaitâlmijd, párnáikiirjijd já esseid sehe televisio- já elleekovekietâčalluid. Angelou čaalij meid čiččâm kirje verd jiešeellimkeerdi. Tain vuosmuš, I Know Why the Caged Bird Sings (1969), lâi vuosmuš afriklâš-ameriklâš ulmuu čäällim ij-fiktiivlâš roomaan, mast šoodâi bestseller.[1]
Angelou lâi aalmuglâšriehtiaktivist, kii poorgâi Martin Luther King Jr.áin já Malcolm X:áin. Sun lâi-uv koskâsii roolâst 1960-lovo Ovtâstum staatâi aalmuglâšriehtilihâstuvvâst. Angelou lâi meiddei máttáátteijee, já tooimâi ameriklâš uápui professorin Wake Forest Universityst.[2][3]
Ive 1993 Angelou tivtâstij suu tiivtâ "On the Pulse of Morning" Bill Clinton vuosmuu presidentin šoddâm tilálâšvuođâst.[4] Ive 2000 Angelou finnij National Medal of Arts -palhâšume.[2]
Eellim mute
Marguerite Annie Johnson šoodâi cuáŋuimáánu 4. peeivi 1928 St. Louisist, Missourist, mutâ vietij stuárráámuu uási suu pärnivuođâst stuorrâvanhimijdis kulen Stampsist, Arkansasist.[5] Suu eeči Bailey Johnson lâi merâvuoimij piämmuterapeut já enni Vivian Baxter Johnson pyecceetipšoo. Angeloust lâi meid ohtâ stuorrâviljâ Bailey Jr., kiäst sun finnij jiellâhnoomâs Maya. Vanhimij iäránem tet párnááh karttáin varriđ stuorrâvanhimijdis luus ive 1931, ko Angelou lâi tuše 3-ihásâš. Suoi aasáin tobbeen maŋgâ ive tassaaš, ko ive 1935 maccáin eenis luus St. Louisân. Tobbeen Angelou kaartâi tuše 8-ihásâžžân seksuaallâš ávhástâllâm já illáástem uhren, ko eeni irge ávhástâlâi suin. Almai ij karttâm tavostis faŋgâlân, mutâ kavnui maŋeláá jaammuššân. Nuorâ Angelou oskoi, ete suu jienâ lâi tovâttâm almaa jäämmim já kielâttui maaŋgâ ihán.[6]
Kirjeh mute
Jiešeellimkeerdih mute
- I Know Why the Caged Bird Sings (1969)
- Gather Together in My Name (1974)
- Singin' and Swingin' and Gettin' Merry Like Christmas (1976)
- The Heart of a Woman (1981)
- All God's Children Need Traveling Shoes (1986)
- A Song Flung Up to Heaven (2002)
- Mom & Me & Mom (2013)
Fáádást eres soojijn mute
Wikimedia Commonsist láá koveh teikkâ eres tiätuvuárháh fáádást Maya Angelou.
Käldeeh mute
- ↑ Biography com Editors: Maya Angelou Biography. Čujottum 1.4.2022. (eŋgâlâskielân)
- ↑ 2,0 2,1 Poetry Foundation: Maya Angelou Poetry Foundation. 31.3.2022. Čujottum 1.4.2022. (eŋgâlâskielân)
- ↑ Maya Angelou: Teacher Remembering Dr. Maya Angelou. Čujottum 1.4.2022. (eŋgâlâskielân)
- ↑ Academy of American Poets: About Maya Angelou | Academy of American Poets poets.org. Čujottum 1.4.2022.
- ↑ Maya Angelou | Biography, Books, Poems, & Facts | Britannica www.britannica.com. Čujottum 1.4.2022. (eŋgâlâskielân)
- ↑ Encyclopedia of Arkansas Encyclopedia of Arkansas. Čujottum 1.4.2022. (eŋgâlâskielân)