Lauri Kristian Relander
Lauri Kristian Relander (31. vyesimáánu 1883 Kurkijoki, Suomâ stuorrâfurstâkodde – 9. kuovâmáánu 1942 Helsig, Suomâ) lâi syemmilâš agronom já politikkár. Sun tooimâi Suomâ täsivääldi nubben presidentin iivij 1925–1931.
Tuávááš mute
Lauri Kristian Relander šoodâi vyesimáánu 31. peeivi 1883 Kurkijokist. Suu eeči lâi agronom Evald Kristian Relander já suu enni lâi ruávást nieidâ Gertrud Maria Olsoni. Relander valmâštui pajeuáppen ive 1901. Luvâttuv maŋa sun luuvâi agronomia vistig Mustiala eennâmviljâlemopâttuvâst já maŋeláá Helsig ollâopâttuvâst. Sun poorgâi totken sehe máttáátteijen já valmâštui tuáhtárin ive 1914. Relander naajâi Signe Östermanáin ive 1906, já sunnui šoodáin kyehti párnáá, Maja-Lisa já Ragnar.[1]
Pooliitlâš karrieer mute
Relander seervâi Viljâleijeiliiton ive 1907.[2] Sun lâi ovdâsteijen staatâpeeivijn 1910–1913 sehe 1917–1920 já tooimâi meid ovdâskode sahâalmajin iivij 1919 já 1920 staatâpeeivijn. Ive 1920 sun nomâttui Viibur eennâmhiärrán. Relander väljejui Suomâ täsivääldi presidentin ive 1925. 41-ihásâžžân sun lâi Suomâ historjá nuorâmus president. Presidentin Relander šoodâi tobdosin "Reeisu-Lassen", tastko sun lâi vuosmuš Suomâ president, kii mađhâšij teivâđ olgoenâmij staatâhoovdâid. Viljâleijeilitto ij valjim Relander presidentiävtukkâssân innig ive 1931 vaaljâin. Relander finnij váimuinfarkt já jaamij kuovâmáánu 9. peeivi 1942.[1]
Käldeeh mute
- ↑ 1,0 1,1 Suomen presidentit Čujottum 11.5.2021 (suomâkielân)
- ↑ KansallisbiografiaČujottum 11.5.2021 (suomâkielân)