Stuorrâčiävžui

Stuorrâčiävžui (Tringa nebularia) lii subarktâsâš lodde, mii kulá čevžui suuhân já täin tot, mii lii adelâm ubâ juávkun noomâ. Tot páimá jieijâs noomâ kirdedijn já seivâgist-uv ađai čiäv-čiäv-čiäv-čiäv.

Stuorrâčiävžui 'Tringa nebularia (Gunnerus, 1767)
Tile	LC (eellimvuáimálâš)
Tile Suomâst	NT (čalmeestoonnum)
Tieđâlâš luokittâllâm
Doomeen	Sellâvááimusliih Eucarya
Kodde	Elleekodde Animalia
Uáiviráiđu	Savosuonâsiih Chordata
Vyeliráiđu	Čielgitávtáliih Vertebrata
Luokka	Lodeh Aves
Lahko	Riddolodeh Charadriiformes
Vyelilahko	Kalâččeijeeh Charadrii
Hiäimu	Miähástuvah Scolopacidae
Suuhâ	Čevžuuh Tringa
Šlaajâ	nebularia

Puárásumos Suomâst riegistum stuorrâčiävžui lii lamaš 3 ive, 11 mánuppaijeed já 23 peivid puáris. Euroop puárásumos lii lamaš Vuáládâhenâmijn riegistum lodde, mii lii lamaš 24 ihheed já 5 mánuppaje puáris.

Stuárudâh já tobdomeerhah

Stuorrâčiävžui lii Säämi čevžuin puoh stuárrámus. Tot lii 30–34 cm kukke já tiäddá 125–290 g. Ton suájákejij koskâ lii 68–70 cm. Loddeest láá kuhes, ruánáá jyelgih. Tast lii njune ucánjáhháá kaavren pajaskulij já ivne lii vielgâdissiähá – váhá tegu čuoivâgist. Njune lii kukke.

Lasanem

Stuorrâčevžuu piervâl lii táválávt koške enâmist jeggiriddoost, mut meid koške jieggimievtâ alne. Monnim tábáhtuvá vyesimáánu pelimuddoost ovdâskulij já nelji fiskis- tâi ruánáásiähá mane almostuveh piervâlkopán, maid kuohtuuh vaanhimlodeh läälliv 23–26 peivid. Jis kávná lode piervâl, te lällee niŋálâs lii nuuvt uáccáá, et luáštá njavhâdemooláádmuudon. Uđâgááh kaččâleh masa tállán piervâlist, maid vaanhimeh aitârdává, mut loppâaaigij niŋálâs hilgo perrus já kuáđá uđâgijdis orráás tiipšon já jieš vuálgá syeinimáánu aalgâkeččin varrimmáátkán Koskâmeerâ stuorrâ juhânjalmijd.

Kovegalleria

• 
  Nuorâ stuorrâčiävžui
• Stuorrâčiävžui Manly Marinast, Australiast
• 
  Stuorrâčevžuu mane Wiesbaden museo nurâlduvvâst
• 
  Ruopsisjyelgčevžuu já stuorrâčevžuu stuárudâhiäruttâs

Fáádást eres soojijn

• Wikimedia Commonsist láá koveh teikkâ eres tiätuvuárháh fáádást Stuorrâčiävžui.